Dóńgelek ústelde sóz alǵan Premer-mınıstrdiń birinshi orynbasary Roman Sklıar sharaǵa qatysýshylarǵa alǵysyn bildirdi.
«Eń aldymen, nemis áriptesterimizge dıalogke ashyqtyǵy jáne ekijaqty seriktestigimizdi nyǵaıtýǵa belsendi atsalysqany úshin shynaıy alǵysymdy bildiremin. Birlese atqarǵan jumysymyzdyń arqasynda Germanııa Federaldy Kansleri Olaf Shols myrzanyń resmı sapary barysynda josparlanǵan barlyq is-shara sátti ótti. Biz endi odan ári jemisti yntymaqtastyqqa úmittenemiz», dedi ol.
Premer-mınıstrdiń birinshi orynbasary aýqymdy shara aıasynda 6,1 mlrd dollardy quraıtyn 30 qujatqa qol qoıylǵanyn tilge tıek etti.
«Búgin qol qoıylǵan Qazaqstan–Germanııa jobalary eki tarapqa da ózara tıimdi bolatynyna senimdimin. Bul bastamalar Qazaqstan men Germanııa arasyndaǵy ekonomıkalyq yntymaqtastyqty nyǵaıtyp qana qoımaıdy, sonymen qatar jańartylatyn energııa kózderi, agroónerkásiptik sektor, kólik-logıstıka sektory jáne ónerkásiptik óndiris sııaqty joǵary tehnologııalyq sektorlardy damytý úshin jańa múmkindikter týǵyzady», dedi Roman Sklıar.
Qol qoıylǵan birlesken jobalar men qujattar resmı túrde ǵana emes, shyn máninde, qarapaıym azamattardyń ómirine oń áserin tıgizetinin aıtqan ol, bolashaqta eki eldiń árbir azamatyna naqty demeý bolatyn uzaq merzimdi jáne oń ózgeristerdiń berik negizin qalaıtynyna senim bildirdi. Bul ózgerister ózara túsinistikti nyǵaıtýǵa jáne ekijaqty qarym-qatynastardyń turaqty damýyna yqpal ete otyryp, yntymaqtastyq pen ózara is-qımyldyń negizgi baǵyttaryna áser etetini sózsiz.
«Mine, osy sebepti bizdiń ashyq jáne syndarly dıalogimiz erekshe mańyzǵa ıe. Áleýetti máselelerdi talqylaý erekshe nazar aýdarýdy jáne tııanaqty kózqarasty talap etedi. Sondyqtan men búgingi kezdesýdi tar sheńberde ótkizý týraly usynys bildirdim. Búgingi kezdesýimiz barlyq aspektini tereńirek jáne egjeı-tegjeıli talqylaýǵa, strategııalyq maqsattarymyzǵa jetý úshin birlesken sheshimder ázirleýge múmkindik beretinine senimdimin», dedi birinshi vıse-premer.
Pikir almasýda taraptar negizinen aýyl sharýashylyǵy tehnıkasyn óndirý jáne satý, sondaı-aq jetkizý boıynsha oı bólisti. Atap aıtqanda, «Báıterek» UBH» AQ men nemis agrobıznes ókilderi arasyndaǵy seriktestikti nyǵaıtýǵa baǵyttalǵan, aýyl sharýashylyǵy tehnıkasyn óndirýge ozyq tehnologııalardy engizý boıynsha tájirıbe men aqparat almasýdy, nemis ónimderin satý úshin qarjylandyrý quraldaryn usynýdy kózdeıtin máseleler talqylandy.
«Biz «Qazaqstan – Germanııa» bıznes forýmyna qatysý úshin arnaıy keldik. Eki el arasynda bolyp jatqan aýqymdy sharanyń bári biz úshin óte mańyzdy. Sáti túsip, búgin birqatar memorandým men kelisimshartqa qol qoıyldy. Onyń qatarynda kólik-logıstıkalyq qyzmetten bastap, ınfraqurylym, túrli óndiriske qatysty kelisimshart, tipti gýmanıtarlyq sala boıynsha da memorandým bar. Mysaly, mamandardyń biliktiligin arttyrý boıynsha da birlesken jobalar qolǵa alynady», dedi Iskerlik delegasııanyń jetekshisi, Býndestag depýtaty, Ekonomıkalyq ister jáne klımatty qorǵaý federaldy mınıstri janyndaǵy Parlamenttik memlekettik hatshy Maıkl Kellner.
Sonymen qatar Qazaqstannyń Eksporttyq-kredıttik agenttigimen de kelisimge keletinderin atap ótken memlekettik hatshy, germandyq jáne eýropalyq kompanııalar bizdiń jobalardy uzaq merzimge qarjylandyratynyn aıtty.
«Bárimizge málim, qazirgi kúnde Qazaqstan shıkizattyq emes salany óristetip, óndiristerdi jolǵa qoıýǵa kúsh salyp jatyr. Ásirese qaıta óńdeýdi, ınfraqurylymdy jáne aýyl sharýashylyǵy ónimderin tereń óńdeýdi damytqysy keledi. Sonymen birge biz óndirgen ónimderimizdi Qazaqstan arqyly aımaqtaǵy basqa elderge eksporttaýdy kózdep otyrmyz. Osy birlesken jobalarymyzdyń keleshegi zor dep oılaımyn. Qazir Ortalyq Azııada ınvestısııa boıynsha Qazaqstan kóp elge tartymdy bolyp tur. Osy tarıhı múmkindikti qoldan shyǵaryp almaı, tıimdi paıdalanǵan durys. Oǵan Qazaqstannyń áleýeti jetedi», dedi memlekettik hatshy.
О́z kezeginde sóz alǵan «Báıterek» UBH» AQ basqarma tóraǵasy Rýstam Qaraǵoıshın Qazaqstan men Germanııa arasyndaǵy ekonomıkalyq yntymaqtastyqty nyǵaıtýdaǵy mańyzdy qadam jasalǵanyn aıtty.
«Biz rekordtyq somasy 6,1 mlrd dollardan asatyn birqatar qujatqa qol qoıdyq. Bul ekonomıkamyzdyń aýyl sharýashylyǵy, jańartylatyn energetıka, sondaı-aq shaǵyn jáne orta bıznesti qoldaý sııaqty negizgi sektorlaryn damytýǵa jańa múmkindikter syılaıdy», dedi ol.
Onyń aıtýynsha, «HORSCH Maschinen GmbH», «CLAAS Global Sales GmbH» jáne «KfW Bankengruppe» sııaqty iri kompanııalarmen jasalǵan kelisimder ozyq tehnologııalardy engizýge serpin berip qana qoımaı, elimizdiń agroónerkásiptik kesheni men energetıkalyq sektoryn jańǵyrtýǵa yqpal etetin jańa jumys oryndaryn qurýǵa jaǵdaı jasaıdy. «Báıterek» holdıngi qarjylyq qoldaý kórsetip, olardy tabysty iske asyrý quraldaryn usynady. Osy jobalardyń ómirsheń bolýyna belsendi atsalysady.
«Sonymen qatar forým aıasynda ótken búgingi dóńgelek ústel pikir almasý jáne nemis seriktesterimizben yntymaqtastyqtyń keleshegin talqylaý alańyna aınaldy. Biz ekijaqty qatynastardy damytýda, ásirese jańartylatyn energetıka, agroónerkásiptik sektor, kólik-logıstıka salasy jáne ónerkásiptik óndiris sııaqty baǵyttarda úlken áleýetti kórip otyrmyz», dep sózin jalǵady Rýstam Qaraǵoıshın.
Qol qoıylǵan kelisimder Germanııamen ekonomıkalyq baılanystardy nyǵaıtady. Osy týraly áńgimelegen basqarma tóraǵasy, elimizde ornyqty jáne ınklıýzıvti ósýdi damytý boıynsha bıik maqsattarǵa qol jetkizýge kómektesetin jańa tabysty jobalarǵa basymdyq beriletinine senim bildirdi.
Tartysty da mazmundy ótken dóńgelek ústeldi vıse-premer Roman Sklıar qorytyndylady. Ashyq ári shynaıy dıalog úshin is-sharaǵa qatysýshylarǵa shyn júrekten alǵysyn bildirgen ol, mundaǵy árbir ustanym jáne ıdeıalarmen bólisý ortaq maqsattardy alǵa jyljytýda asa mańyzdy ekenin jetkizdi.
«Kezdesý barysynda aıtylǵan usynystardy joǵary baǵalaımyz jáne aldaǵy birlesken jumysymyzda barlyq bastama muqııat qarastyrylyp, eskeriletinine sendirgim keledi. Qazaqstan tarapynyń atynan aldaǵy ýaqytta yntymaqtastyqty jalǵastyryp, tyǵyz baılanysty saqtaýǵa nıetti ekenimizge sendiremin», dedi ol.
Dóńgelek ústel aıaqtalǵan soń «Báıterek» UBH» AQ basqarma tóraǵasy jýrnalısterdiń suraqtaryna jaýap berdi.
«Bul dóńgelek ústel bizge óte mańyzdy. Qazir 30-dan astam kelisimshartqa qol qoıyldy. Jalpy somasy 6 mlrd dollardan asyp jyǵylady. Onyń 3 mlrd dollardan astamy «Baıterek» tarapynan jasalyp jatyr», dedi basqarma tóraǵasy.
Birqatar kelisimniń mazmunyna toqtalǵan holdıng basshysy, negizinen agrosektorǵa erekshe kóńil bólinip otyrǵanyn jetkizdi.
«Germanııanyń ekonomıkasy da, tehnologııasy da óte jyldam damyp keledi. Sondyqtan biz bul elden ınvestısııa tartýǵa áreket etip jatyrmyz. Ásirese jańa tehnologııalaryn ákelýge múddelimiz. Aldaǵy ýaqytta osyndaı kezdesýlerdi jıi uıymdastyryp, oǵan qatysýshylardyń sanyn da kóbeıtkimiz keledi. Budan bylaı «Báıterek» holdıngi Germanııamen qarym-qatynasty osy baǵytty damyta beredi», dep sózin qorytyndylady Rýstam Qaraǵoıshın.
