Sýret: kazislam.kz
80 úmitker qatysqan baıqaýda úmitkerler Qurandy mánerlep oqý, 10 para, 20 para, 30 para syndy tórt atalym boıynsha ózara kim myqtyny anyqtady. «Qazaq – erteden Quran dese qulaǵy túrýli turatyn, Allanyń sózin qurmet tutatyn halyq. Kimniń úıine barsańyz da tórinde Quran ilýli turady, al ony bireý oqysa, uıyp tyńdaıdy. Elimizde jyl sanap qarılarymyzdyń qatary artyp keledi. Osy baıqaýdy ótkizýge demeýshi bolǵan Baharıdın Nuǵmanulyna, Sádýaqas Oljabaev qarıymyz bastaǵan ádilqazy múshelerine alǵysymdy bildiremin», dedi is-sharaǵa arnaıy qatysqan bas múftı Naýryzbaı qajy Taǵanuly.
Eki kúnge sozylǵan jarys nátıjesinde jeńimpazdar men júldegerler anyqtalyp, qomaqty qarjylaı, zattaı syılyqtarǵa ıe boldy. Atap aıtqanda, qazylar alqasynyń sheshimimen «Mánerlep oqý» saıysynda atyraýlyq Salamat Imanǵalıev, 10 para boıynsha astanalyq Dinmuhamed Ábishev, 20 para boıynsha qaraǵandylyq Arsen Esimbek, al 30 para, ıaǵnı Qurandy tolyq oqý boıynsha almatylyq Ábilqaıyr Juban jeńimpaz dep tanyldy.
Bas júldeni jeńip alǵandar men júldegerlerdiń bárine 300 myń teńgeden 4 mln teńgege deıin qarjylaı syıaqy tabys etildi. Al Qurandy tolyq jattaýdan aldyna jan salmaǵan Ábilqaıyr Juban «Haval» markaly avtokólikti taqymyna basty.
Eske sala ketsek, respýblıkalyq baıqaýǵa qatysýǵa aldymen ár óńirde oblystyq irikteý jarystary uıymdastyrylǵan bolatyn. Mundaı Quran jarystaryn elimizde jyl saıyn ótkizý jaqsy dástúrge aınalǵan.
