Baspana kezeginde turǵan 288 adamǵa jalǵa beriletin páter kiltteri tabystaldy. Ladojskaıa kóshesi, 17 mekenjaıy boıynsha boı kótergen turǵyn úıge jetim balalar, kópbalaly otbasylar jáne áleýmettik osal otbasylar sanatyndaǵy azamattar qonystandy. Oblys ákimi Asaıyn Baıhanov qonys ıelerin arnaıy quttyqtady.
– Osy jyldyń naýryz aıynda kezekte turǵandardyń úsh sanatyna 210 páter berdik. Al búgin kópten kútken páter kiltterin Pavlodardyń úı kezeginde turǵan 288 janǵa tabystaǵanyma óte qýanyshtymyn. Keıbireýlerińizge bul kúndi uzaq jyl kútýge týra kelgenin bilemin. Oblys basshylyǵy atynan uzaq kúttirgenimizge keshirim suraımyn jáne túsinistik tanytyp, shydamdylyq tanytqandaryńyzǵa alǵysymdy bildiremin. Bıyl taǵy 250 páter tapsyramyz. Biraq olar «Shańyraq» jáne «Baqytty otbasy» memlekettik baǵdarlamalary aıasynda áleýmettik-nesıelik turǵyn úı baǵyty boıynsha beriledi, – dedi óńir basshysy.
A.Baıhanov «Dostyq» shaǵyn aýdanynyń qurylysy jalǵasatynyn atap ótti. «Jaıly mektep» baǵdarlamasy aıasynda zamanǵa saı bilim uıasy salynýda, balabaqsha, emhana, muz arenasy, konsert zaly, meshit salý josparlanǵan. Qalalyq qoǵamdyq kólik qozǵalysy, onyń ishinde tramvaı baǵyttarynyń jelileri uzartylatyn bolady.
Áleýmettik baspanaǵa ıe bolǵandardyń biri – Mońǵolııanyń týmasy, qandas Janat Daýan. Ol jubaıy Maǵrıpa Kankóneımen birge 8 bala tárbıelep otyr.
– 2006 jyly atamekenimizge kóship kelip, Moıyldy aýylyna qonys teptik. Turǵyn úı kezeginde shamamen 17 jyl turdym jáne eshqashan úmitimdi úzgen emespin. Memleketke óte rızamyn, bul bizdiń kópten kútken qýanyshymyz, – dep oı bólisti kópbalaly otbasynyń otaǵasy.
Buǵan qosa óńir bıligi turǵyn úı kezeginde turǵan otbasylardy baspanamen qamtýǵa jalpy somasy 12,8 mlrd teńge bolatyn qundy qaǵazdardy arnap otyr. Bul qarajat 815 otbasyn baspanamen qamtýǵa jetedi. Bıyl oblysta turǵyn úı kezeginde turǵan azamattardyń máselesin sheshý úshin 3 mlrd teńge qarajat qundy qaǵazdar túrinde baǵyttaldy. Biraq bul páterlerge kirgen otbasylar ony satyp ala almaıdy. Al keıin satyp alý quqyǵy beriletin páterlerge odan 4 ese kóp qarajat, ıaǵnı 12,8 mlrd teńge bólinip otyr.
– Biz bıylǵy maýsym aıynan beri qundy qaǵazdar shyǵarýdy qolǵa aldyq. Memlekettik qundy qaǵazdardyń jalpy somasy – 12,8 mlrd teńge. Bul qarajatqa kezekte turǵan 815 otbasyny satyp alý quqyǵy beriletin baspanamen qamtımyz. Tek Pavlodar qalasy boıynsha qundy qaǵazdar arqyly 480 páter satyp alynýy kerek, – dep habarlady oblystyq ekonomıka jáne bıýdjettik josparlaý basqarmasynyń basshysy Irına Nazarchýk.
Áleýmettik turǵyn úı qurylysyna bıyl bıýdjet qarajaty qarastyrylmaǵan. Esesine ıpotekalyq baǵdarlama jaqsy jumys istep tur. Iаǵnı qurylys kompanııalary úı salady da, ony «Otbasy bank» arqyly ıpotekaǵa shyǵarady.
PAVLODAR
