Memleket basshysynyń quttyqtaýynda Berdibek Soqpaqbaev qazaq balalar ádebıetiniń damýyna ólsheýsiz úles qosqan qarymdy qalamger ekeni aıtylǵan. Onyń «Balalyq shaqqa saıahat», «Meniń atym – Qoja», «О́lgender qaıtyp kelmeıdi», «Jekpe-jek» syndy teńdessiz týyndylar jazyp, eshqashan eskirmeıtin ǵajaıyp mura qaldyrǵany da nazarǵa alynǵan. Adam psıhologııasyn, qazaqtyń jandúnıesin asqan sheberlikpen asha bilgen sýretkerdiń shyǵarmalaryndaǵy shynaıy beıneler naǵyz halyqtyq keıipkerlerge aınaldy. Birneshe býyn urpaqtyń jazýshy týyndylaryn oqyp ósýi – osynyń aıqyn dáleli.
«Berdibek Soqpaqbaev qazaq ádebıetinde eshkimge uqsamaıtyn qaıtalanbas qoltańbasyn qaldyrdy. Ardaqty azamattyń esimin ulyqtap, eńbegin el jadynda jańǵyrtý – bárimizge ortaq paryz. Osy oraıda jazýshynyń 100 jyldyǵy IýNESKO-nyń ataýly kúnderi tizbesine engizilýi jáne týǵan jerinde sáýletti eskertkishiniń boı kóterýi – áıgili sóz zergerine degen qadir-qurmettiń belgisi. Qalamgerdiń ózine ǵana emes, onyń keıipkerine eskertkish ornatý – óte sırek kezdesetin oqıǵa. Astana tórinde turǵan Qojanyń músini Soqpaqbaev shyǵarmashylyǵynyń ult rýhanııatynda erekshe oryn alatynyn kórsetedi», delingen Prezıdenttiń quttyqtaýynda.
Máýlen Áshimbaev atalǵan ólkeden Raıymbekteı aıbyndy batyr men Muqaǵalıdaı arqaly aqyn shyqqanyn tilge tıek etip, osy óńirdiń tól perzenti Berdibek Soqpaqbaevtyń esimi qazaq ádebıetiniń tarıhyna altyn árippen jazylǵanyna nazar aýdardy. Sondaı-aq ol sońyna qaldyrǵan murasy ulttyń rýhanı qazynasyna aınalǵan kórnekti tulǵalardyń esimin ulyqtaý jáne olardy ónegeli ómirin keńinen zerdelep, dáripteý asa mańyzdy ekenin atap ótti.
Palata spıkeri B.Soqpaqbaevtyń shyǵarmashylyǵy árdaıym ózgelerden daralanyp turatynyn jáne olar shynaıylyq pen qarapaıymdylyqqa taban tireıtinin aıtty. Jazýshynyń týyndylary halqymyzben qosa búkil álem oqyrmandarynyń ystyq yqylasyna bólenip, ár býynnyń jadynda saqtalatyn qundy dúnıege aınaldy. Qalamgerdiń «Meniń atym – Qoja» povesiniń 68 tilge aýdarylýy – sonyń jarqyn kórinisi. Al shyǵarma jelisimen túsirilgen kınokartına 1967 jyly Kann qalasynda ótken balalar men jasóspirimderge arnalǵan fılmderdiń halyqaralyq kınofestıvalinde dıplomant atandy.
Sonymen qatar Senat tóraǵasy jas býynnyń boıynda durys qundylyqtar júıesin qalyptastyrý isinde ádebıettiń, ónerdiń jáne kreatıvti ındýstrııanyń róli joǵary ekenin, bul máselege Memleket basshysy birneshe márte toqtalǵanyn atap ótti.
«Prezıdentimiz Qasym-Jomart Toqaev óskeleń urpaqtyń boıynda oqý mádenıetin qalyptastyrýdyń mańyzyna nazar aýdaryp, osy baǵytta «Balalar kitaphanasy» atty jańa baǵdarlamany qolǵa alýdy tapsyrdy. Bul joba qazaq ádebıetiniń túrli kezeńderi men janrlaryn qamtıtyn kitaptardyń arnaıy tizimin jasaqtap, olardyń balalarǵa qoljetimdi bolýy qamtamasyz etýdi kózdeıdi. Sondaı-aq bıyl elde «Ulttyq kitap kúni» belgilendi. Osyndaı keshendi sharalardyń barlyǵy qalamgerlerimizdiń esimin máńgilik etýge zor úlesin qosatyny sózsiz. Sondyqtan aldaǵy ýaqytta múddeli memlekettik organdar men Jazýshylar odaǵy birlese otyryp, osy baǵyttaǵy júıeli jumystardy ári qaraı jalǵastyrady dep senemiz», dedi M.Áshimbaev.
Sapar aıasynda palata spıkeri Qarasaz aýylyna arnaıy at basyn buryp, Muqaǵalı Maqataevtyń ádebı-memorıaldyq mýzeıine bardy jáne óńirdiń daryndy jastaryn qoldaýǵa arnalǵan О́ner mektebiniń ashylý rásimine qatysty. Berdibek Soqpaqbaevtyń 100 jyldyq mereıtoıyna jınalǵan meımandarmen birge jazýshy atyndaǵy saıabaqta aǵash otyrǵyzdy. Buǵan qosa Kegen aýylyna baryp, «Qamqorlyq» balalardy ońaltý ortalyǵynyń qyzmetimen tanysty.
Sondaı-aq M.Áshimbaev Memleket basshysynyń bastamasymen qolǵa alynǵan «Aýyl kitaphanalaryna arnalǵan 100 kitap» aksııasyna atsalysty. Senat tóraǵasy jazýshy B.Soqpaqbaev týǵan Qostóbe aýylyndaǵy mektepke qazaq ádebıetiniń klassıkteri men sheteldik avtorlardyń kitaptaryn tartý etti. Atap aıtqanda, mektep kitaphanasy Abaı, Ybyraı Altynsarın, Muhtar Áýezov, Shyńǵys Aıtmatov, Ernest Hemıngýeı, Danıel Defo, Ivan Týrgenev, Jıýl Vern jáne basqa da tulǵalardyń shyǵarmalarymen tolyqty.
