Jasandy zerde jazǵan alǵashqy romandardyń biri – «The Day A Computer Writes A Novel». Qazaqshalasaq, «Kompıýter roman jazǵan kún». Bul shyǵarma 2016 jyly Japonııadaǵy Hoshı Sınıchı atyndaǵy ádebı baıqaýǵa qatysyp, birinshi kezeńnen ótken. Romanda adamdardyń kompıýtermen qarym-qatynasy týraly, sondaı-aq bolashaqta robottardyń adam ómirine qalaı áser etetini týraly baıandalǵan.
Eń kishkentaı kitap
Kanadadaǵy «Simon Fraser» ýnıversıtetiniń ǵalymdary jasaǵan álemdegi eń kishkentaı kitaptyń ataýy – «Teeny Ted from Turnip Town».
Gınness rekordtar kitabyna engen bul erekshe kitap 2007 jyly jaryq kórdi. О́lshemi 0,07 mm ǵana bolǵandyqtan, ony tek mıkroskoppen oqýǵa bolady. Shyǵarmadaǵy áripterdi nanotehnologııa kómegimen kremnıı krıstaldaryna oıyp jazǵan. Álbette, shaǵyn kitaptyń mazmuny da bar. Balalarǵa arnalǵan ertegide Ted atty jasóspirimniń ómiri baıandalady. Kitap avtory – Malkolm Dýglas Chaplın. Al baspager – Robert Chaplın.
Eń úlken kitaphana
Vashıngtonda ornalasqan Kongress kitaphanasy – álemdegi eń úlken kitaphana.
Búginde kitaphana qorynda 470 tildegi 38 mıllıonnan astam kitap bar, al sórelerdiń jalpy uzyndyǵy 1200 shaqyrymǵa jetedi. Taǵy bir tańǵalarlyǵy, munda 3600 qyzmetker jumys isteıdi. Bul mekeme tek kitaptardy ǵana emes basqa da qundy materıaldardy saqtaıdy. Onda 3,6 mıllıon aýdıo, 14 mıllıon fotosýret, 5,5 mıllıon geografııalyq karta, 8,1 mıllıon mýzykalyq jınaq, 70 mıllıon qoljazba bar.
