UNICEF pen DDU derekteri boıynsha, Qazaqstan táýelsizdiginiń alǵashqy jyldarynda árbir myń náresteniń 23-i bir aıǵa da jetpeı shetinep otyrǵan. Qazir jaǵdaı áldeqaıda jaqsardy desek – 2022 jyldyń sońyn aqaraı náreste ólimi 5 promılleden tómen bolǵan. Bul Eýropalyq odaq elderindegi statıstıkaǵa óte jaqyn ári Ortalyq Azııa elderi arasyndaǵy eń jaqsy kórsetkish deýge bolady.
Qazaqstanda alǵash ret ótkizilip otyrǵan neonatologtardyń aýqymdy jıyny jańa týǵan, shala týǵan nárestelerge medısınalyq kómek kórsetý sapasyn jaqsartýdy, elimizdegi neonataldyq ólim-jitim kórsetkishterin tómendete túsýdi kózdeıdi.
Eki kúnge sozylatyn forýmda sheteldik mamandar neonatologııa salasyndaǵy negizgi máselelerdi, sonyń ishinde altyn saǵatta jańa týǵan náresteni alǵashqy reanımasııalaý, shala týǵan jáne aýrýshań nárestelerdi qatarǵa qosýda arnaıy tamaqty qoldanýdaǵy úzdik tájirıbelerin, respıratorlyq qoldaýdyń halyqaralyq tásilderin, jańa týǵan nárestelerdiń ınfeksııalarymen kúres, joǵary qaterli júktilik kezinde baqylaýdyń progressıvti taktıkasy men basqa da ózekti taqyryptardy talqylap otyr.
Kókeıkesti konferensııaǵa QR Densaýlyq saqtaý mınıstrliginiń muryndyq bolsa, Qazaqstan akýsher-gınekologtary men neonatologtarynyń kongresi «Astana medısına ýnıversıteti» KEAQ men AYALA qaıyrymdylyq qorynyń qoldaýyna súıenip uıymdastyrdy.
QR shtattan tys bas neonatology jáne Qazaqstan akýsher-gınekologtary men neonatologtary kongresiniń prezıdenti Bekturǵan Karın osynaý jıyn búkil Ortalyq Azııa óńirinde neonataldyq ólim-jitimdi azaıtýǵa eleýli úles qosyp, neonatologııa men perınatologııadaǵy halyqaralyq jáne óńirlik kóshbasshylarmen yntymaqtastyqty odan ári jemisti etýge kómektesedi dep esepteıdi.
«Qazirgi tańda Qazaqstandaǵy neonataldyq qyzmet perınataldyq ortalyqtardyń, perzenthanalardyń myńdaǵan dárigerleri men medbıkelerin biriktirip, olar medısınalyq kómektiń sapasyn jaqsartý úshin tynymsyz jumys istep jatyr. Sapa birinshi kezekte dárigerlerdiń de, orta medısınalyq qyzmetkerlerdiń de bilimine, tájirıbesi men daǵdylaryna baılanysty. Sondyqtan jetekshi halyqaralyq tájirıbeshilerdiń qatysýymen konferensııalar ótkizý – eldegi neonatologııany damytýda asa mańyzdy. Biz bilim berýdegi bastamalarymyzdy jyldar boıy qoldap, demeýshilik tanytyp kele jatqan AYALA qaıyrymdylyq qoryna rızashylyǵymyzdy bildiremiz», deıdi Bekturǵan Qarın.
О́z kezeginde AYALA qaıyrymdylyq qorynyń negizin qalaǵan ári prezıdenti Aıdan Súleımenova: «AYALA qaıyrymdylyq qory 14 jyldan beri tegin sheberlik synyptaryn, semınarlardy uıymdastyryp keledi, otandyq neonatologtardyń, medbıkelerdiń, akýsherlerdiń kásibı mashyǵyn damytý maqsatynda osyndaı konferensııalarǵa qoldaý tanytady. Oǵan qosa «AYALA akademııasy» onlaın-platformasyn qazaq tilindegi kez kelgen mobıldi qurylǵydan qoljetimdi tegin beıne kýrstarymen belsendi túrde damytý ústindemiz. Birneshe jyldan beri túrli elderden neonatologtar men neonataldyq medbıkelerdi biriktire otyryp, onlaın-klýbtar ótkizýge kómektesemiz. Dárigerlerimizdiń alǵan bilimi men eń úzdik halyqaralyq tájirıbeni kúndelikti qoldanýy Qazaqstandaǵy neonataldyq medısınalyq kómek retinde naǵyz serpiliske negiz bolyp keledi», dedi.
Shala týǵan shaqalaqtardy qutqarýdy kózdeıtin halyqaralyq aýqymdaǵy jıynǵa AstraZeneca, Baxter, MedConceptService, Drager, Acino syndy kompanııalar demeýshilik tanytsa, Paris-Saclay ýnıversıtettik aýrýhanalary (Fransııa), Klıvlendtegi Cleveland Clinic Children's and Pediatric Institute (AQSh), Santaros Klinikos Vılnıýs ýnıversıteti aýrýhanasy, Sahlgrenska ýnıversıtetiniń Sılvııa patshaıym balalar aýrýhanasy (Shvesııa), Poznan medısına ǵylymdary ýnıversıteti (Polsha), Neonataldyq máseleler jónindegi respýblıkalyq perınataldyq ortalyq (О́zbekstan), Ana men balany qorǵaý ulttyq ortalyǵy (Qyrǵyzstan), Almaty qalasynyń Pedıatrııa jáne balalar hırýrgııasy ǵylymı ortalyǵy, Astana medısına ýnıversıteti, Túrkistan, О́skemen, Qaraǵandy, Qyzylorda, Taraz qalalarynyń oblystyq perınataldyq ortalyqtary men basqa da elimizdegi jetekshi medısınalyq mekemeler, ortalyqtardyń medısına ǵylymdarynyń 26 kandıdaty, professorlary men sarapshylary baıandama jasaıdy.
Almaty
