Foto: Baıan Súleımenqyzy
Aptalyqtyń sport jýrnalıstıkasy salasyna arnalǵan «Emosııalarmen bólisý: sporttyq buqaralyq aqparat quraldarynyń jankúıerlerdiń arasynda qyzyǵýshylyqty qalyptastyrýda jáne saqtaýda áseri» taqyrybynda ótken paneldik sessııasyn sport menedjer, jýrnalıst Jiger Azbergenov júrgizdi. Ol sessııaǵa qatysýshy spıkerlerge sport jýrnalıstıkasynyń qazirgi jaı-kúıi, básekelestik orta qalyptastyrý, kadr daıyndaý, jýrnalıstik etıka, jalǵan aqparat, áleýmettik jeliniń áseri jóninde saýaldar qoıyp, oılaryn ortaǵa salýdy surady.
Qazsport telearnasynyń bas prodıýseri Ádilet Qusaıynov kadr máselesi ózekti bolyp turǵanyn aıtty.
«Jýrnalıstıka mamandyǵynda oqyp júrgen jastar tájirıbeden ótýge keledi. Biraq oqý bitirgen soń eshqaısysyn taba almaı qalamyz. Jas mamandar bul salaǵa kelgisi kelmeıdi», dedi prodıýser.
Ol sonymen qatar sport jýrnalıstıkasy barlyq sport túrin qamtıtyndyǵyna qaramastan, kez-kelgen sport túrine qatysty saraptama jasap, pikirin bildiretin spıkerlerdiń, onyń ishinde qazaq tildi mamandardyń joqtyǵy sport jýrnalıstıkasynda negizgi qıyndyq týdyryp otyrǵan másele ekenine toqtaldy.
Talqylaý barysynda qazir kez-kelgen adam jelide arnasyn ashyp sport týraly oıyn aıta alatyny, áleýmettik jelide live formatta vıdeo túsirip, aqparat taratatyny, sondyqtan telearnaǵa aqparattyń ózge de qyrlaryn usynýǵa týra keletini, bul jýrnalısterden únemi izdenis ústinde bolýdy talap etetini sóz boldy. Buǵan qosa saýatty sport jýrnalıstıkasyn qalyptastyrý maqsatynda kommentatorlarǵa arnalǵan sózdik daıyndalyp jatqany aıtyldy.
