Foto: Halyqaralyq kúres federasııasy
QR Týrızm jáne sport mınıstrligi Sportty damytý dıreksııasynyń baspasóz qyzmetiniń jazýynsha dúbirli dodada Zýlfııa Iаhıarova (55 kg), Dıana Kaıýmova (59 kg), Irına Kazıýlına (65 kg) men Jámılá Baqbergenova (72 kg) kúresedi.
Bul tizimnen Jámılá Baqbergenovany erekshe atap ótýge bolady. Ol – 72 kg deıingi salmaqta álem reıtınginiń kóshbasshysy. Eki dúrkin álem chempıonatynda kúmis (2021 jáne 2022 jyly), taǵy bir márte qola (2023 jyly) júldege ıe bolǵan. Sonymen qatar Azııanyń 3 dúrkin jeńimpazy jáne birneshe dúrkin júldegeri ekenin aıta ketken jón.
Jámılá byltyr Belgradtaǵy álem chempıonatynda top jaryp, Olımpıada baǵdarlamasyna kiretin salmaqqa aýysqysy kelgenin aıtqan. Alaıda jartylaı fınalda mońǵolııalyq palýanǵa ese jiberip, keıinnen úzdik úshtikti túıindegen.
Bapkerler qosyny tańdaǵan qalǵan 3 otandasymyzdyń da halyqaralyq arenadaǵy tájirıbesi mol.
Qazaqstan áıelder quramasynyń bas bapkeri Qaırat Saǵadıev qazir komandany Almaty oblysyndaǵy «Aqbulaq» ortalyǵyna jınap, jattyǵýdyń alǵashqy kezeńin ótkizip jatyr.
«Qazir daıyndyqtyń bel ortasyna keldik. Aıdyń aıaǵynda jattyǵý jumysy az ýaqytqa toqtaıdy. Sosyn, 2-kezeńdi Astana qalasynda uıymdastyramyz. Onda palýandar tehnıka men taktıka jaǵynan daıyndyqqa den qoıady», dedi Qaırat Saǵadıev.
Eske sala keteıik, osyǵan deıin mundaı formattaǵy dúnıejúzilik doda (olımpıadalyq emes salmaqtaǵy) tek 2016 jyly Majarstan astanasynda ótken. Ol kezde qazaq palýandarynan Nurlan Bekjanov (erkin kúres, 70 kg) kúmis, Aıym Ábdildına (55 kg) qola medal jeńip alǵan.
