Foto: egemen.kz
Elordada ótip jatqan dárstúrli aptalyq barysynda jýrnalıst, PhD, PR sarapshysy, «7010 PODCAST» podkastynyń avtory «Podkast - jýrnalıstıkanyń jańa janry?» taqyrybynda kezekti sessııany ótkizdi.
Sessııaǵa «Abay LIVE» podkastynyń avtory Abaı Seıfýlla, TV jáne YouTube jobalarynyń prodıýseri, Aiqap.podcast podkastynyń avtory Almas Maratuly, jýrnalıst, «M.S.Nárikbaev atyndaǵy KAZGIýÝ Ýnıversıteti» AQ Basqarma tóraǵasynyń orynbasary Erbolat Muhamedjan, «Jıza» podkastynyń avtory Ǵalııa Idoıatova jáne jýrnalıst Aqbópe Táńirbergen qatysty.
Sarapshylardyń aıtýynsha, búginde jýrnalısterdiń sapaly kontent ázirleýine barlyq qajetti jaǵdaı jasalǵan. Ásirese ınternet, áleýmettik jeliler men jasandy ıntellekt zamanaýı jýrnalıstiń senimdi kómek quraldaryna aınaldy.
Almas Maratulynyń aıtýynsha, Qazaqstanda podkast formaty jyldam ári jan-jaqty damyp keledi.
«Buǵan YouTube jelisine júktelgen podkasttardyń mıllıondaǵan qaralymdary dálel bola alady. Qazirdiń ózinde dástúrli jýrnalıstıka, ásirese, televıdenıe salasynyń ókilderi YouTube-qa «ketip» ózekti áleýmettik máselelerdi qozǵap otyr. Buǵan erkindik sebep boldy. Máselen, telearna jýrnalısteri óz ónimderine pikirlerin qosa almaıdy, senzýrasy taǵy bar. Al táýelsiz aımaqta podkast júrgizgen adam ózin erkin sezinip, qalaǵan spıkermen suhbattasyp, óz oıyn anyq jetkize alady. Osyndaı format qarapaıym halyqqa da unaıdy», dedi spıker.
Al Abaı Seıfýlla YouTube platformasynda salalyq podkastar áli de jetispeıtinin tilge tıek etti.
«Halyq kóbinese «Dope sóz», «Zamandas» nemese «Airan» sııaqty podkast kanaldaryna tirkelgen. Olar qoǵamdaǵy ózekti oqıǵalardy talqylap, tanymal tulǵalardy ǵana shaqyrady. Qazirgi ýaqytta aýdıo nemese vıdeopodkasttardy júkteýge bolatyn kóptegen platforma bar. Qazaqstanda bul tendensııa ári qaraı jalǵasyp, odan ári damýy úshin salalyq podkastardyń sanyn arttyrý qajet. Máselen, mýzyka, kıno, kitap, astronomııa jáne ǵarysh, densaýlyq jáne medısına, bala tárbıesi, otbasylyq qundylyqtar sııaqty taqyryptar kórermenge qyzyqty bolýy múmkin», dep oıyn bólisti spıker.
Sessııa barysynda Erbolat Muhamedjan taǵy bir máseleni kóterdi. Spıkerdiń aıtýynsha, qazaqtildi kontent shyǵarý isinde podkasttardyń úlesi óte az.
«Orys tilinde túsirilgen podkast qazaq tilinde júrgizilgen podkastqa qaraǵanda kóbirek qaralym jınaıtyny ras. Kórermender saraptalǵan, yqshamdalǵan, ári jan-jaqty qyzyqtyrylǵan aqparatqa nazar aýdarady. Kóbisi «podkast - YouTube-tiń suhbat janry» dep oılaıdy. Biraq podkast tek suhbat qana emes. Dese de Qazaqstanda suhbat janry kóbirek tanylǵan. Meıli, suhbat bolsyn, saraptama bolsyn, basqasy bolsyn, qazaq tilinde bolsa bolǵany. Iаǵnı, kontent otandyq bolsa, qazaq tilinde bolǵany abzal», dep oıyn jetkizdi Erbolat Muhamedjan.
«Jıza» podkastynyń avtory Ǵalııa Idoıatova sapaly kontent qarjylyq qoldaýdy qajet etetinin alǵa tartty.
«Táýelsiz podkast-meıkerler demeýshilerdiń qarjysyna sapaly kontent shyǵarady. Iá, bul jarnama. Árıne, qazir tek bir ǵana iphone-nyń kómegimen vıdeo túsirip, ony montajdap YouTube platformasyna júkteýge bolady. Biraq kórermender sapaly, ádemi, jetildirilgen beınege qaraıdy. Elimizde podkast janryn odan ári damytý kerek. Podkast janrynda tek bir ǵana ereje bar - eshqandaı erejeni ustanbaý. Sondyqtan shyǵarmashylyǵyn shyńdaǵysy keletin, ózindik ımıdjdi qalyptastyrǵysy keletin adamdardyń aldyńda barlyq múmkindikter bar. Olardy tek utymdy paıdalana bilý kerek», dedi Ǵalııa Idoıatova.
Sessııa barysynda jýrnalıst Aqbópe Táńirbergen de áriptesterimen tildesip, podkast shyǵarýǵa nıetti ekenin jetkizdi. Ol televıdenıe men YouTube jelisiniń jumystaryn salystyryp, utymdy tustary men kontent jasaýdaǵy qıyndyqtardy atady.
