2007 jyldan bastap Global Innovation Index (WIPO) 133 eldiń kórsetkishterin 80 baǵyt boıynsha baǵalap keledi. Bul jerde ekonomıka men óndiristiń ósýine ınnovasııalardyń yqpalyn qarastyrady. Reıtıng osy saladaǵy jańa strategııalardy ázirleýdiń mańyzdy ındıkatory retinde qyzmet etedi. Reıtıngte joǵary kórsetkishke ıe bolý iske asyrylyp jatqan memlekettik reformalardyń halyqaralyq deńgeıde baǵalanǵanyn kórsetedi. Sondaı-aq álemdik arenadaǵy bedeldi jaqsartýǵa jáne Qazaqstanǵa tikeleı ınvestısııalar tartýǵa yqpal etedi.
Saltanatty rásimge Dúnıejúzilik zııatkerlik menshik uıymynyń (WIPO) bas dırektory Darren Tang, Global Innovation Index birlesken redaktory Sacha Výnch Vınsent, memleketter jáne úkimetter basshylary, sonyń ishinde Túrkııa Respýblıkasynyń Prezıdenti Redjep Taııp Erdoǵan, Barbados Premer-mınıstri Mıa Amor Mottlı, Vetnam Sosıalıstik Respýblıkasynyń Premer-mınıstri Fam Mın Chın, áleýmettik kásipkerlik jáne ınnovasııa salasyndaǵy jetekshi sarapshylar qatysty.
Qazaqstan sapaly ósim kórsetip, jahandyq reıtıngte 81-orynnan 78-orynǵa kóterilip, Úndistan men Irannan keıin Ortalyq jáne Ońtústik Azııa kóshbasshylary úshtigine endi. «Memlekettik basqarýdyń tıimdiligi», «Zańnyń ústemdigi», «Oqý, matematıka jáne jaratylystaný ǵylymdary boıynsha PISA shkalasy», «Naryqtyń damýy», «Bıznesti júrgizý», «Tikeleı ınvestısııalardyń taza aǵyny, IJО́ %» kórsetkishteri boıynsha ilgerileý baıqalady.
Reıtıngtegi eń úlken ósim «Kreatıvti taýarlar men qyzmetter» kórsetkishterinde boldy. Bul jerde 93-orynnan 65-orynǵa, «Ulttyq kórkem fılmder/mln adam» 61-orynnan 31-orynǵa, «Joǵarǵy deńgeıdegi domender (TLD)/myń adam» 115-ten 80-ge deıingi satylardan kórindi.
Reıtıng redaktorlary Qazaqstannyń myna ındıkatorlarmen álemniń úzdik 30 eline kirgenin erekshe atap ótti:
«Onlaın úkimet» – 8-oryn, «Shyǵý tegi boıynsha paıdaly modelder/mlrd. Satyp alý qabiletiniń parıteti boıynsha IJО́» – 10-oryn, «Elektrondyq qatysý» – 15-oryn, «Oqýshylar men muǵalimderdiń araqatynasy, orta bilim» – 16-oryn, «Eńbek ónimdiliginiń ósýi, %» – 30-oryn.
Global Innovation Index-te Qazaqstannyń reıtıngin arttyrýǵa Memleket basshysynyń ǵylym jáne ınnovasııalar máseleleri jónindegi keńesshisi K.Zakarııanyń basshylyǵymen múddeli memlekettik organdar sapynan Prezıdent Ákimshiligi janyndaǵy Jobalaý ofısiniń jumysy yqpal etti.
2024 jyldyń 4 qazanynda Dúnıejúzilik zııatkerlik menshik uıymynyń (WIPO) qoldaýymen elimizde alǵash ret Azııa elderi úshin Global Innovation Index 2024 esebin jarııalaýdyń óńirlik rásimi ótedi. Is-sharaǵa Azııa elderiniń ınnovasııa mınıstrleri men patenttik vedomstvolarynyń basshylary, sondaı-aq dıplomatııalyq korpýstyń, halyqaralyq uıymdardyń jáne múddeli úkimettik emes uıymdardyń ókilderi qatysady.
Dúnıejúzilik zııatkerlik menshik uıymy (UN WIPO) – Birikken Ulttar Uıymynyń 15 mamandandyrylǵan mekemesiniń biri. Onyń qyzmeti shyǵarmashylyq qyzmetti yntalandyrýǵa jáne zııatkerlik menshikti (IP) halyqaralyq qorǵaýǵa yqpal etýge baǵyttalǵan. WIPO taýar belgileri men patentterdi halyqaralyq tirkeýdi jeńildetedi.
Jahandyq ınnovasııalyq ındeks – ınnovasııalardyń elderdiń damýyna áserin anyqtaý boıynsha álem elderiniń aýqymdy ekonomıkalyq zertteýi. Halyqaralyq reıtıng 2007 jyldan beri 80 túrli kórsetkishten álemniń 133 elin baǵalaıdy. Bul ındekstiń ósýiniń mańyzdylyǵy ony Qytaı, Sıngapýr, BAÁ, Túrkııa, t.b. elderdiń úkimettik strategııalaryna engizý arqyly anyqtalady.
