Aqtaýda Halyq shtaby músheleri «Mańǵystaýmunaıgaz» AQ qyzmetkerlerimen júzdesti. Is-sharaǵa 150-den asa adam qatysty. Jıyn barysynda Memleket basshysy eńbek adamyna aıryqsha basymdyq beretini, olardyń arasynda el damýyna ólsheýsiz úles qosyp kele jatqan munaı-gaz salasynyń qyzmetkerleri oıyp turyp oryn alatyny erekshe atalyp ótti.
Sonymen qatar shtab músheleri Prezıdent bastamasymen Konstıtýsııaǵa túzetýler engizilgenin, soǵan sáıkes jer men onyń qoınaýyndaǵy qazba baılyq halyqqa tıesili ekenin eske saldy. Parlament depýtattary jer qoınaýyn paıdalaný týraly jańa zań qabyldanǵanyn atap ótti. Endi elimizde jańadan ashylǵan barlyq iri ken orny ulttyq kompanııalardyń 50% jáne odan joǵary úlesimen ıgerilýge tıis. Sondaı-aq jer qoınaýyn paıdalanýshy kompanııalar endi qazba baılyǵy azaıyp bara jatqan ken oryndarynda jumys júrgizýdi jalǵastyrýǵa nemese ornalasqan aımaqty damytýǵa qarajat quıýǵa mindetti. Sonyń nátıjesinde «О́zenMunaıGaz» jáne «Mańǵystaýmunaıgaz» kompanııalarynda myńdaǵan jumys orny saqtalady.
«Prezıdent bıylǵy Joldaýynda AES salý boıynsha tańdaýdy halyqtyń ózi jasaýǵa tıis ekenin basa aıtty. Bul – Memleket basshysynyń buljymas ustanymy. Qazir eldegi eń mańyzdy sheshimderdiń barlyǵy da halyqtyń talqysyna salynady. Bul qoǵamda jańa saıası mádenıet qalyptasqanyn kórsetedi. Ár azamat el taǵdyry aldyndaǵy jaýapkershilikti sezinýi qajet», dedi Májilis depýtaty, «Amanat» partııasy fraksııasynyń jetekshisi Elnur Beısenbaev.
Sonymen qatar AES salýdy qoldaý jónindegi Halyq shtaby músheleri aımaqtaǵy eń ózekti máseleniń biri aýyzsý tapshylyǵyna toqtaldy. Máselen, bıyl Fort-Shevchenkodaǵy sý tazartý qubyry stansasynyń qurylysyn aıaqtaýǵa 2,5 mlrd teńge bólindi. Sondaı-aq 2025 jylǵa qaraı «Kendirli» kýrorttyq aımaǵynda jańa sý tushytý zaýyty salynady. «Kaspıı» sý tushytý zaýytyn keńeıtý jumysy jalǵasyp jatyr. Bul mańyzdy jobalar turaqty qýat kózin qajet etedi.
Senek aýylynda AES salýdy qoldaý jónindegi Halyq shtaby músheleri jergilikti turǵyndarmen óńirdegi ózekti máselelerdi talqylady. Bul rette aýylda jańa jumys oryndaryn qurý, nesıe alý, jańa óndiris oryndaryn ashý jáne basqa da máseleler sóz boldy. Memleket «Aýyl amanaty» baǵdarlamasy aıasynda aýyl turǵyndaryna jeke kásip ashý úshin 2,5%-dyq qomaqty qarajat bóledi.
Osy kúni AES salýdy qoldaý jónindegi Halyq shtaby músheleri óńirdiń belsendi azamattarymen kezdesti. Búginde atalǵan oblys eń joǵary júkteme kezinde shetelden elektr energııasyn satyp alady. Energııa tapshylyǵy óndiris oryndaryn ashý, jańa jumys oryndaryn qurý, kommýnaldyq ınfraqurylymdy damytý jumysyn tejeıdi. Osy tapshylyqqa baılanysty kóptegen óndiris tek qaǵaz júzinde qalyp qoıady. Shtab músheleri atap ótkendeı, búginde Mańǵystaýdy elimizdiń biryńǵaı energııa júıesine qosý jumysy júrgizilip jatyr.
Bul kezdesýler barysynda mańǵystaýlyqtar aldaǵy referendýmǵa belsendi qatysýǵa nıet bildirdi.
