Polısııa departamenti baspasóz qyzmetiniń málimetinshe, 27 qyrkúıek kúni Aqjar aýdanynyń ortalyǵy Talshyq aýylyndaǵy mektepte oqýshylardyń esinen tanyp qulap jatqany týraly aqparat túsken.
Habarlasqan adam dálizde ótkir ıistiń turǵany týraly aıtqan. Oqıǵa ornyna kelgen jedel-tergeý tobynyń qyzmetkerleri men ýchaskelik polısııa ınspektory mektepten oqýshylardy, ustazdar men jumysshylardy evakýasııalap, mán-jaıdy anyqtady.
Osy mekteptiń eki muǵalimi burysh ballonyn teksermek bolǵan. Olardyń bireýi munyń saldary qandaı bolýy múmkin ekenin oılamastan, ballonnyń ishindegisin shashyp jibergen. Saldarynan qaýipti ıis mektep ishine tarap ketken.
Saldarynan aýdandyq aýrýhanaǵa 11 men 9 jastaǵy eki oqýshy, sondaı-aq 53 jastaǵy áıel júgindi. Olarǵa medısınalyq kómek kórsetilgen soń úılerine jiberildi. Burysh ballonyn shashqan muǵalimder ákimshilik jaýapkershilikke tartyldy.
Soltústik Qazaqstan oblysy Bilim basqarmasy baspasóz qyzmeti de osy oqıǵaǵa qatysty túsinik berdi.
- Mekteptiń birinshi qabatynda ótkir ıis shyǵysymen barlyq oqýshylar men qyzmetkerler dalaǵa shyǵaryldy. Medısınalyq qyzmetker barlyǵyn tekserip shyqty. Oqıǵa ornyna kelgen polısııa qyzmetkerleri mán-jaıdy anyqtady. Mekteptiń dene shynyqtyrý pániniń muǵalimi áriptesine burysh ballonyn kórsetpek bolǵan. Qazirgi ýaqytta tergeý júrip jatyr. Balalar men ustazdardyń jaǵdaıy qalypty. Sottyń sheshimimen ustazdarǵa shara qoldanylatyn bolady, – dedi baspasóz hatshysy Ásel Orazbaeva.
