foto QR Kólik mınıstrligi
Kólik mınıstri Marat Qarabaev Shyǵys Qazaqstan oblysyna jumys sapary barysynda elimizdiń shyǵysynda jańa áýejaılar ornalasatyn alańdarmen tanysty.
Katonqaraǵaı aýdanynda jańa áýejaı Soldatovo aýylynyń qasynda salynady. Bul aýyl Katonqaraǵaı jáne Úlken Naryn aýyldarynyń arasynda ornalasqan. Katonqaraǵaı aýylyna deıingi qashyqtyq 38 shaqyrymdy quraıdy.
Al Zaısanda áýejaı Sátbaev atyndaǵy burynǵy áskerı áýeaılaqtyń aýmaǵynda ornalasady. Bul jerden Zaısan qalasyna deıingi qashyqtyq 25 shaqyrymdy quraıdy.
Bastapqy kezeńde áýejaılarda Q400, ATR 42/72, CRJ200 áýe kemeleri úshin uzyndyǵy 2200 metr jasandy ushý-qoný jolaǵy salynady. Áýe kemeleriniń bul túrleri Astana men Almatydan oblystyń týrıstik oryndaryna deıin áýe qatynasyn qamtamasyz etýge múmkindik beredi.
Keıin bul jolaqty keńeıtý jumystary júrgizilip, syıymdylyǵy kóbirek úlken ushaqtardy (Airbus A320, Boeing 737) qabyldaýǵa da múmkindik bolady.
«Memleket basshysynyń tapsyrmasyn ýaqtyly oryndaý úshin el óńirlerine jumys saparymen shyǵyp, nysandar salynatyn ýchaskelermen tanysýdamyz. Aldaǵy ýaqytta qolǵa alynatyn jumystardy pysyqtadyq. Úsh áýejaıdyń da qurylysy kelesi 2025 jyly bastalady», dep atap ótti mınıstr.
Mınıstr jergilikti atqarýshy organnyń ókilderimen, qurylys jáne avıasııa salasynyń sarapshylarymen kezdesý ótkizdi, onda áýejaılar salý jospary talqylandy.
