Elimizdiń saýda saıasatyna qatysty DSU-nyń 30-dan astam múshesiniń elshileri sóz sóıledi. Olardyń barlyǵy da elimizdiń kópjaqty saýda júıesin nyǵaıtýǵa qosqan eleýli úlesine toqtalyp, ekonomıkany ártaraptandyrý jáne saýda-ekonomıkalyq reformalardy júrgizý, onyń ishinde saýda rásimderin ońaılatý, ashyqtyqty arttyrý, sondaı-aq jalpy alǵanda álemdik saýdanyń turaqtylyǵy men boljamdylyǵyn qoldaý jónindegi jumysyna baǵa berdi.
Atalǵan elderdiń turaqty ókilderi saýda rásimderin jeńildetýge baǵyttalǵan Qazaqstannyń reformalaryn joǵary baǵalap, DSU-nyń saýda rásimderin ońaılatý týraly kelisimi boıynsha óz mindettemelerin 100% oryndaǵanyn aıtty. Negizgi jetistikterdiń ishinde BUU-nyń avtomattandyrylǵan kedendik derekter júıesi (ASYCUDA) bazasynda IýNKTAD-pen seriktestikte ázirlengen eksporttyq-ımporttyq operasııalar úshin «Biryńǵaı tereze» júıesin jáne «ASTANA-1» platformasyn engizýdi qosa alǵanda, kedendik prosesterdi tolyq sıfrlandyrý erekshe kózge túsedi. Qazaqstan sondaı-aq «KEDEN» jańa aqparattyq platformasyn ázirleı otyryp, jańǵyrtýdyń kelesi kezeńine ótýde.
Sonymen qatar Jenevadaǵy ókildikterdiń basshylary Qazaqstannyń agroónerkásiptik keshendi jańǵyrtýǵa, ásirese Qazaqstan Respýblıkasynyń 2022-2026 jyldarǵa arnalǵan ınvestısııalyq saıasat tujyrymdamasyn iske asyrý sheńberinde qolaıly ınvestısııalyq ahýal jasaýǵa baǵyttalǵan strategııalyq reformalaryn atap ótti.
DSU-nyń kóptegen músheleri ekijaqty saýdany nyǵaıtýdyń jáne ekonomıkanyń túrli sektorlaryndaǵy ózara is-qımyldy keńeıtýdiń mańyzdylyǵyn atap ótip, Qazaqstanmen odan ári strategııalyq yntymaqtastyqqa daıyn ekendikterin bildirdi. Bul málimdemeler álemdik arenada senimdi saýda seriktesi retinde Qazaqstanǵa degen senimniń joǵary ekenin kórsetti.
