О́ıtkeni Jezqazǵan – Qyzylorda jolynyń 208 shaqyrymyna qatysty 8 lot negizinde jarııalanǵan tenderdi Qytaıdyń 4 kompanııasy jeńip aldy. Olardyń bári de Ulytaý oblysyna kelip tirkeýden ótti. Qazir jeńimpaz kompanııalar kúrdeli qurylys júrgizýge daıyndyq jumystaryn bastap ta ketti. Buǵan jýyrda kózimiz jetti.
Negizgi jolǵa japsarlasa aınalma jol salý qazirdiń ózinde bastalyp jatyr. Sondaı-aq keleshekte boı kóteretin 8 vahtalyq qalashyqtyń da orny anyqtalyp, tegistelýde. Qalashyqtarda jumyskerlerge qajetti jatyn bólmeler, jýyný, ashana, t.b. osy tárizdi barlyq jaǵdaı jasalady.
Al saǵatyna 160 tonna ónim beretin asfalt-beton zaýyty burynnan jumys istep tur eken. Bul zaýyttyń ónimi qazir Qyzylorda jaǵynda salynyp jatqan joldyń qajetine paıdalanylyp jatsa, keıin Jezqazǵan jaǵyndaǵy joldy asfalt-betonmen qamtamasyz etedi. Al aldaǵy ýaqytta taǵy da osyndaı 3 zaýyt salynatyn bolady.
«Biz jumysty 8 ýchaskede bir mezgilde bastaımyz. Sondyqtan bıylǵy kúz, qys mezgilinde barlyq negizgi jumysqa qajetti sharýalardy rettep alǵymyz keledi», deıdi qytaılyq kompanııanyń ókili Sıan Sıaý Don.
«Ýaqytty bosqa jibermeı qazir aınalma jol, qalashyqtar, asfalt-beton zaýyttaryn salyp alsaq, keler kóktemde jumysty bastaý ózimizge jeńil bolady. Sondyqtan iske kirisip jatyrmyz. Eger materıaldyq bazamyz myqty bolsa, jóndeý jumysyn kópke sozbaımyz, 2026 jyldyń sońyna deıin bitiremiz», deıdi taǵy bir merdiger Song Daı Fý.
Árıne, jol qurylysyna negizinen jergilikti azamattar tartylatyny anyq. Sondaı-aq jergilikti kompanııalar servıstik qyzmet kórsetýge daıyn. Qazir olar qytaılyq áriptesterimen ekijaqty kelisimshart jasasyp jatyr.
«QazAvtoJol» UK» AQ Ulytaý oblysy fılıalynyń dırektory Suńǵat Rahymjanov: «Bul joldyń qurylysyn aımaq halqy kópten kútip júrgeni belgili. Mine, endi daıyndyq jumysy bastalyp jatyr. Merdigerler tarapynan qurylysqa eki myńǵa tarta jumysker kerek ekeni aıtylyp otyr. Bul osynshama jumys orny ashylatynyn aıǵaqtaıdy. Demek, bizdiń azamattarymyzdyń jol qurylysyna atsalysýǵa tolyq múmkindigi bar», – dedi.
Jalpy quny 108 mlrd teńge bolatyn jobanyń qurylysy aımaqqa jańa lep alyp kelip jatyr. Ulytaýlyqtardyń sol qurylystyń belortasynan tabylatynyna árıne, esh kúmán joq.
Ulytaý oblysy
