Konferensııaǵa qatysýshylarǵa kolledj tarıhyn taspalaǵan derekti fılm usynylyp, Muhtar Áýezovtiń eskertkishine gúl shoqtaryn qoıý rásimi ótkizildi. Is-sharada Oqý-aǵartý birinshi vıse-mınıstri Natalıa Jumadildaeva, pedagogıkalyq ǵylymdarynyń doktory, professor Asqarbek Qusaıynov, Parlament Senatynyń depýtaty Altynbek Nuhuly kolledjdiń bilim úderisindegi róli, onyń jańashyldyqtary men qoǵamǵa tıgizgen áseri týraly oılaryn ortaǵa saldy. Sonymen qatar baıandamashylar mundaı konferensııalar bilim salasyndaǵy yntymaqtastyqty nyǵaıtýǵa, tájirıbe almasýǵa jáne bolashaq urpaqqa úlgi bolatyn tulǵalardy tanytýǵa zor múmkindik beretinin atap ótti.
Konferensııa aıasynda semınar-praktıkým, fotokórme jáne muraǵat materıaldary negizinde jasaqtalǵan qujattar kórmesi uıymdastyryldy. Sondaı-aq tanymal túlekterge arnalǵan taqyryptyq kabınetterdiń tusaýy kesilip, «Oqý ornynyń túlekteri – tarıhı tulǵalar» taǵzym taqtasy ashyldy. Akademık Qanysh Sátbaev, Álkeı Marǵulan, aqyn-jazýshy Turlyhan Qasenuly, ǵalym Qaıym Muhamedhanov sııaqty tulǵalarǵa arnalǵan kabınetter ashyldy.
Merekelik is-shara barysynda 22 muǵalim Oqý-aǵartý mınıstrliginiń Qurmet gramotasy, Oqý-aǵartý mınıstrliginiń Alǵysy, «Y.Altynsarın» tósbelgisi, «Bilim berý isiniń qurmetti qyzmetkeri» tósbelgisi, «Tehnıkalyq jáne kásiptik bilim berý isiniń úzdigi» sııaqty mańyzdy marapat tabystaldy. Buǵan qosa oblys ákimdigi tarapynan kolledj ujymyna 10 mln teńgelik sertıfıkat tartý etildi. Al úzdik stýdentterge «Úzdik Áýezovshi», «Asylhan Bekbaev atyndaǵy shákirtaqy» taǵaıyndaldy.
Osyǵan deıin Muhtar Áýezov atyndaǵy pedagogıkalyq kolledjiniń 120 jyldyq mereıtoıy aıasynda «Qarajyra» AQ demeýshiligimen salynǵan «ES-aımaq» rýhanı ortalyǵynyń saltanatty ashylý rásimi ótken. Eki qabatty ǵımarattyń jalpy aýmaǵy 2 500 sharshy metr. Jańa ǵımarat stýdentter kampýsynyń ortasynda ornalasqan, zamanaýı jabdyqtarmen qamtamasyz etilgen. Jańa ortalyq 500 stýdentke arnalǵan. 7 arnaıy kabınet pen zal bar. Konsert zaly 300 orynǵa shaqtalǵan. Onda zamanaýı LED ekran, jaryq jáne dybys qondyrǵylary, avtomattandyrylǵan sahna mehanızmderi men jumsaq oryndyqtarmen jabdyqtalǵan.
Muhtar Áýezov, Júsipbek Aımaýytuly, Qanysh Sátbaev, Álkeı Marǵulan, Sháken Aımanovtaı tulǵalardyń izi qalǵan oqý ordasy keleshekte de birtýar tulǵalarǵa tuǵyr, ónerli ul-qyzdardyń rýhanı qýatyn arttyratyn orda bolary sózsiz.
Abaı oblysy
