Ádepkide jylyna 12,7 mln sharshy metr keramogranıt shyǵarylady. Jobanyń ekinshi kezeńinde zaýyt tolyq qýatyna kóship, jylyna 25,4 mln sharshy metr keramogranıt óndiriledi. Kásiporynda 350 jańa jumys orny ashylady. Birinshi kezeńde otandyq naryqtaǵy suranystyń úshten biri qanaǵattandyrylsa, ekinshi kezeńde ishki naryq atalǵan qurylys materıalymen tolyq qamtamasyz etiledi. Suranystan artylǵan taýardy alys-jaqyn shetelge eksporttaýǵa da múmkindik týady.
«Zaýyt – megapolıs ekonomıkasynyń aýqymdy ınvestısııalyq jobasynyń biri. О́ndiris ornynyń esebinen aldaǵy kezde bıýdjettiń tabys salyǵy artady. Qanshama adam jumysqa alynady. Memleket basshysynyń tapsyrmasyna sáıkes, ınvestor tartyp, olarǵa qolaıly jaǵdaı jasaý – atqarýshy bıliktiń basty mindeti», dedi Shymkent qalasynyń ákimi Ǵabıt Syzdyqbekov.
«Osyǵan oraı ınvestorlardyń qasynan tabylyp, jobalaryna jan-jaqty qoldaý kórsetýge jergilikti ákimdik birinshi kezekte múddeli. Prezıdenttiń tapsyrmasyn oryndaýǵa bar múmkindikti jumsap kelemiz. Bul kúndi shyn máninde tarıhı sát desek bolady. Sebebi keramogranıt shyǵaratyn mundaı aýqymdy óndiris orny Ortalyq Azııada tuńǵysh ret Shymkentte ashylyp otyr. Kelip jatqan ınvestorlarǵa tek qýanýymyz kerek. Jýyrda Qytaı eliniń Sıan qalasyna issaparmen baryp qaıtqan edik. Sonda kóptegen ınvestısııalyq kelisimge qol jetkizdik. Qytaı ınvestorlarymen áriptestik baılanysty ári qaraı da kúsheıtemiz. Sonyń bir mysaly, keleshekte megapolıste Qytaı ınvestısııasyna qoqys óńdeıtin úlken zaýyt salynady», dedi ol.
Kásipkerlik jáne ındýstrııalyq-ınnovasııalyq damý basqarmasy bergen málimetke súıensek, zaýyttyń qurylysy 2023 jylǵy naýryzda bastalǵan. Kásiporyn qysqa ýaqyt ishinde salynyp bitti. Joba eksportqa negizdelgendikten, óndiriletin taýar ishki naryqtan bólek shetelge de shyǵarylady. Keramogranıt zaýytynan basqa bıyl «Juldyz» ındýstrıaldy aımaǵynda taǵy eki kásiporyn qurylady. Ol – temir-beton konstrýksııalary men esik-tereze profılderin shyǵaratyn zaýyttar. Jalpy, «Juldyz» óndiris alańynda keleshekte qyryqqa jýyq joba iske asady. «Wan Sheng Ceramic» óndiris orny – sol jobalardyń alǵashqysy.
Keramogranıt óndiretin kásiporynǵa tıesili aýmaq 30 gektardan asady. Jańa zaýyt sol jerdiń jartysyn alyp jatyr. 2025 jyly jobanyń ekinshi kezeńi iske assa, qalǵan 15 gektardaı jerge taǵy da zaýyt salynady. О́ndiris orny tolyq qýatyna kóshken sátte jumysshylar sany 700-den asady. Eń mańyzdysy jumysshylardyń denin jergilikti turǵyndar quraıdy. Aıta keteıik, «Wan Sheng Ceramic» – shahardaǵy keramogranıt óndiretin ekinshi zaýyt. Alǵashqysy «Zerde-Keramıka» seriktestigi dep atalady. Alaıda jergilikti kásipkerlerdiń qarjysyna ashylǵan bul kásiporynnyń óndiristik qýaty tómendeý.
Jańa keramogranıt óndirisi jobasyna tikeleı qarjy quıǵan qytaılyq ınvestor Hý Djen Gonyń aıtýynsha, TMD elderinde onyń kompanııasynyń júzege asyryp jatqan jobalary óte kóp.
«Shymkent qalasy ákimdigimen arada bolǵan ınvestısııalyq kelisimniń nátıjesinde, respýblıkanyń úshinshi megapolısinen osy kásiporyndy salýǵa nıet bildirdik. Sondaı-aq bizdi ınvestorlarǵa jasalǵan túrli salyq jeńildikteri, ınfraqurylym qoldaýlary qyzyqtyrdy. Aldaǵy ýaqytta qala ákimdigi zaýytqa temirjol tuıyǵyn salyp berýdi oılastyryp jatyr», dedi Hý Djen Go.
Qytaı eliniń shahar ekonomıkasyna jumsap otyrǵan ınvestısııasy óte qomaqty. Kelesi jyly shyǵystaǵy kórshimizdiń ınvestısııasyna megapolısten jelatın óndiretin jańa zaýyt salynady degen jospar bar. Budan basqa da birlesken jobalar jetip artylady. Osyǵan qarap Shymkentte júzege asyp jatqan bıznes bastamalardyń ishinde Qytaı ınvestorlarynyń alar úlesi joǵary dep aıtýǵa bolady.
ShYMKENT
