Úndistannyń soltústik bóligindegi Aýlı qalasy mańyndaǵy «Sýrıa» oqý-jattyǵý ortalyǵynda oqý-jattyǵýdyń saltanatty ashylý rásimi ótti. Oqý-jattyǵýǵa qatysýshylardy Qazaqstan áskerı qyzmetshiler atynan «Ońtústik» óńirlik qolbasshylyǵy áskerleri qolbasshysynyń birinshi orynbasary – shtab bastyǵy, polkovnık Nurlan Káribaev quttyqtady.
Oqý-jattyǵý barysynda eki eldiń áskerı qyzmetshileri taý daıarlyǵy sheńberindegi birlesken jumys pen terrorızmge qarsy qaýipsizdik boıynsha praktıkalyq sabaqtarǵa qatysady. Qazaqstan desantshylary úndilik áriptesterimen birlesip, taýly jerde parashıýtpen sekiredi.
– Kúndelikti qyzmeti taý daıarlyǵynan turatyn áskerı qyzmetshiler úshin oqý-jattyǵýǵa qatysý jaýyngerlik daǵdylardy arttyrýǵa edáýir yqpal etedi. «QazÚnd-2024» oqý-jattyǵýyn ótkizý Úndistan men Qazaqstan Qarýly kúshteri arasyndaǵy berik baılanys pen dostyqty kórsetedi, – deıdi Qazaqstan kontıngentiniń komandıri podpolkovnık Arman Sabyrov.
Alǵash ret qazaq-úndi áskerı qyzmetshileriniń birlesken oqý-jattyǵýy 2018 jyly ótken. Sodan beri atalǵan jattyǵý eki eldiń polıgondarynda kezekpen uıymdastyrylyp keledi.
– Birlesken taktıkalyq oqý-jattyǵýy Úndistan men Qazaqstan Qorǵanys mınıstrlikteri arasyndaǵy ekijaqty yntymaqtastyq josparyn iske asyrý sheńberinde ótkiziledi. Oqý-jattyǵý aımaqtaǵy turaqtylyq pen beıbitshilikti saqtaý úshin mańyzdy ári biz onyń qaýipsizdigimizge yqpal etetinine senimdimiz, – deıdi Úndistan kontıngentiniń komandıri polkovnık Iаogesh Ýpadhaı.
