Atyraý oblysynda osyndaı maqsatty kózdegen jańa zaýyttyń birinshi jelisi iske qosyldy. Arnaıy ekonomıkalyq aımaqta ornalasqan óndiris ornynda polıefırli geosıntetıkalyq materıal shyǵarylady. Oblys ákiminiń orynbasary Marat Mýrzıevtiń pikirinshe, memleket tarapynan ekonomıkany ártaraptandyrýǵa úles qosatyn osyndaı jobanyń bárine qoldaý kórsetiledi.
«Memleket basshysynyń ınvestısııa tartý jónindegi tapsyrmasyn júzege asyrý aıasynda «qara altyndy» eksporttaýmen shektelmeı, jańa ónim shyǵaratyn jobalar iske asyryla bastady. Sonyń biri – polıefırli geosıntetıkalyq materıal óndirisi. Jańa zaýyttyń ónimi ishki naryqty otandyq qurylys materıaldarymen qamtamasyz etýge múmkindik beredi», deıdi M.Mýrzıev.
«Intago Qazaqstan» JShS bas dırektory Azamat Asylbekovtiń aıtýyna qaraǵanda, óndiris ornynyń jyldyq qýaty – 15 mln sharshy metr. Kásiporyn jaqyn arada jergilikti ónimniń ishki aınalymdaǵy úlesin arttyrýǵa serpin berip, polıefırli materıaldar ımportyna degen táýeldilikten aryltady.
«Elimizde polıefırli geosıntetıkalyq materıalǵa suranys bar. Osyndaı materıaldyń shamamen 10 mln sharshy metri Túrkııa, Qytaı, Reseıden alynady. О́nimderimizdiń basym bóligin otandyq tutynýshylarǵa usynamyz. Úshten birin eksportqa jiberýdi kózdedik. Reseıdegi tutynýshymyz 3 mln sharshy metr materıaldy satyp alýǵa kelisimshart jasady», deıdi A.Asylbekov.
Jańa zaýyttyń jumysy táýlik boıy toqtamaıdy. О́ndiris ornyndaǵy tehnologııalyq jelilerdiń damylsyz úderisin qadaǵalaýǵa 40 adam jaýapty. О́z isin jaýapkershilikpen atqarýǵa kirisken jergilikti mamandardyń ortasha jasy – 31.
«Zaýyttyń jumys isteý ustanymy – plastıkterdi óńdep, qaldyqsyz ónim shyǵarý. Bul materıal joǵary sapasymen, sý ótkizbeıtin tózimdiligimen erekshelenedi. Ony jol jáne nysan qurylysynda, temirjol men drenajdyq júıege qoldanýǵa bolady. Ásirese jańadan salynatyn jol tabanyn nyǵaıtý úshin tóseledi. Mundaı sapaly materıal tóselgen jol jabyndysy buzylmaıdy», deıdi A.Asylbekov.
Bas dırektordyń málimetinshe, jobaǵa baǵyttalǵan ınvestısııalyq qarjy kólemi – 1,4 mlrd teńge. Onyń 715 mln teńgesi «О́nerkásipti qoldaý qorynan» alynǵan. 2025 jyly taǵy 3 jobany iske qosý josparlanyp otyr. Oǵan 4 mlrd teńge ınvestısııa tartylyp, jańadan 160 jumys orny ashylady. Sondaı-aq zaýytty shıkizatpen qamtý máselesi qolǵa alynbaq. Osyǵan oraı aldaǵy jyldyń kókteminde «Jasyl damý» baǵdarlamasy aıasynda Atyraýda shtapeldi talshyq shyǵaratyn jeli iske qosylady. Jalpy quny 2 mlrd teńge kóleminde ınvestısııa quıylatyn joba aıasynda 61 jumys ornyn ashý kózdelip otyr. «Qazaqstanda shtapeldi talshyq shyǵaratyn óndiris orny joq. Ony shyǵarýǵa qaıta óńdelgen plastıkalyq bótelkelerdi shıkizat retinde qoldanamyz», dedi A.Asylbekov.
Atyraý oblysy
