Bilim qýǵan sondaı kóptiń birin Túrkııadan taptyq. Nurıla Shotbaı – Túrkııanyń Denızli qalasyndaǵy Pamýkkale ýnıversıteti «Aǵylshyn fılologııasy» mamandyǵynyń 3-kýrs stýdenti. Sheteldik joǵary oqý ornyna memlekettik baǵdarlamasyz, óz kúshimen tolyq grantqa túskenine eldegi alǵan biliminiń, sanasyna sáýle quıyp, ilim nárin sińirgen ustazdarynyń eńbegi ushan-teńiz ekenin aıtady.
«Jambyl oblysy Qordaı aýlynyń №1 Dinmuhammed Qonaev atyndaǵy mektep-gımnazııasynda árip tanydym. Alǵashqy ustazym – Aınur Qalyqova. Áýelde gımnazııanyń qarapaıym synybynda oqydym. Eki synypty qatarynan úzdik bitirgen soń, gımnazııa synybyna aýystyrdy. Gımnazııa synybynda oqytqan Aqnur Maıshybekova da, qolyma birinshi bolyp qalam ustatqan Aınur muǵalim de kásibı, myqty mamandar. Negizi bilimdegi irgetas sanalatyn bastaýysh synypta jaqsy oqysań, keıingi bilim alýǵa oń áserin tıgizetinin kóbi aıtyp jatady ǵoı. 5-synyptaǵy jetekshim Ámına Ábdýálıqyzy ári qaraı jetilýime jaǵdaı jasady. Sol kisi bulaqtyń kózin ashqandaı, baǵytymdy aıqyndap berdi. Erinbeı-jalyqpaı qazaq tilinen taldaý jasatyp, shyǵarma, esse jazýdyń qyr-syryn sabaqta ǵana emes, 45 mınýttan bólek ýaqytta da úıretkeni jadymda jańǵyrady», deıdi Nurıla keıipkerimiz.
Ádette, mekteptegi qaı muǵalim qatal ári talapshyl bolsa, oqýshylardyń basym bóligi sol pedagogtiń pánin bar zeıinin salyp oqıdy ǵoı ári bolashaǵy da sol nazary aýǵan sabaqqa baılanysty bolatyndaı. Qazir Túrkııada aǵylshyn tili men ádebıeti mamandyǵynda oqyp júrgen Nurılanyń da mekteptegi aǵylshyn tili muǵalimi eń qatal ári eń talap qoıǵysh ustazdardyń biri bolǵan eken. Onyń kóńilinen shyǵamyn dep úzdik oqý, izdenip oqý aqyr sońynda eshkimge salmaq salmaı sheteldik ýnıversıtettiń grantyn ıelenýge ıtermeledi.
«Mektepte aǵylshynnan bergen Záýresh Toǵaıqyzy ár sabaǵynda kitaptyń búkil taqyrybyn ótip, jattyǵýlaryn jasatatyn. Toqsandyq baqylaýda áńgimelesýden (speaking) kóp tapsyrma beretin. Sol kezde tym kóp beretini unamaıtyn, balalyq qoı, biraq sonyń nátıjesinde sóılep úırendik. Slaıdtardy plakatqa syzyp, kádimgideı joba qorǵatatyn. Aǵylshyn tilinen búkil bilim baıqaýlaryna qatystyratyn, oqýshylardy qyzyqtyratyn. Bir kez elimizdiń barlyq qalasynan oqýshylar baq synaǵan olımpıadaǵa aýlymyzdan bizdiń mekteptiń oqýshylaryn ǵana qatystyrdy. Baıqaýǵa sheteldikter ádilqazy boldy, qatelespesem, jartylaı fınalǵa deıin jettik. Bastysy, bizde senim paıda boldy. Qazir aqparat ashyq qoı, sońǵy synypta senimmen sheteldik joǵary oqý oryndaryna túsýge talap etetin IELTS tesin tapsyrdym. Sodan alǵan halyqaralyq sertıfıkatymdy attestatymmen qosa tapsyryp, grantqa tústim. Ýnıversıtette talap kúshti. Sabaqtan qalsań, emtıhanǵa kire almaı qalasyń. Bir pánniń emtıhanynan óte almasań, qaıta tapsyra salmaısyń, kelesi kýrsta sol pándi qaıta oqısyń. Abyroımen oqýyma elimizde alǵan bilimimniń, mekteptegi muǵalimderimniń úlesi óte zor. Mereke qarsańynda maǵan sabaq bergen barlyq ustazyma sheksiz alǵysymdy bildiremin», deıdi Nurıla.
