Sýretti túsirgen avtor
«Bizdiń ýchaskede Móńkeuly kóshesindegi kópqabatty úılerdiń birqatar turǵyndary tirkelgen. Barlyǵy 2444 saılaýshymyz bar. Sonyń 8-i úıden daýys beremiz dep ótinish jasady. Ázirge bári oıdaǵydaı ótip jatyr. Ýchaske dál ýaqytynda jumysyn bastady. Eń alǵash bolyp Almagúl Ramazanova esimdi turǵyn keldi. Ol kisige shaǵyn syılyǵymyzdy berdik», deıdi №421 ýchaskelik referendým komıssııasynyń tóraǵasy Sáýle Aıtqalıeva.
Al №427 ýchaskesinde ánuran oryndalǵan sátine biz de kýá boldyq. Referendým komıssııasynyń tóraǵasy Ásem Shárıpova bul ýchaskede 1801 daýys berýshi tirkelgenin aıtty. Jalpy komıssııa quramy 7 adamnan turady, 5 baqylaýshy kelip tirkelgen. Baqylaýshylardyń arasynda «Jarııa» uıymynan, «Amanat» partııasynan bar. Densaýlyǵyna baılanysty 9 adam daýys berýdi óz úıinen jasaýǵa ótinish bergen eken.
«Olarǵa túske taman baramyz. Ýrnasy mórlengen, kóligimiz daıyn», deıdi Ásem Málikqyzy.
№421 ýchaskede alǵashqy 10 mınýttyń ishinde 15 adam kelip, daýys bergenin kórdik. «Siz Qazaqstanda atom elektr stansasyn salýǵa kelisesiz be?» degen jalǵyz saýal qoıylǵan bıýlletenge daýys berýshiler arasynda jastar da, úlkender de bar.
«Meniń jasym 88-ge qaraı ketti. Kempirim Sándesh – 85-te. Búgin biz de erte turyp, el bolashaǵy úshin mańyzdy saýalǵa jaýap berdik. Qazaqstan erteńgi kúni eshkimge kiriptar bolmaýy úshin bul tańdaý mańyzdy dep esepteımin», deıdi eńbek ardageri, Aqjaıyq aýdanynyń qurmetti azamaty Saıyn Moldaǵalıev.
Egde jasyna qaramaı elgezektik tanytqan qos qarııa №421 ýchaskelik referendým komıssııasynyń tóraǵasy Sáýle Aıtqalıqyzynyń qolynan shaǵyn syılyqqa ıe boldy.
Batys Qazaqstan oblysynda búgin referendým boıynsha 496 ýchaske jumys istep jatyr.
