Shymkenttikter uıymshyldyq tanytty

Shymkentte 18 jasqa tolǵan 660 563 turǵyn daýys berýge quqyly. Qalada referendým kúni 344 ýchaske jumys istedi. Onyń 23-i – jabyq. Ol erekshe sanattaǵy azamattarǵa arnaldy.

Saıası mańyzdy oqıǵa kúni megapolıste qoǵamdyq kólikter tegin júrdi. Invataksıler múgedektigi bar azamattarǵa qyzmet kórsetti. Megapolıste erekshe qyzmetti qa­jet etken 3 615 saılaýshy tirkeldi. Múgedektigi bar 1 512 azamatqa ınvataksı jumyldyryldy. Estý qabileti buzylǵan 1 423 adamǵa sýrdoaýdarmashylar kómekke kelse, kórý qabileti nashar 680 turǵynǵa taktıldi joldar, braıldi bıýl­letender, qulaqqaptar qaras­tyryldy.

Referendýmda «Amanat» par­tııasy Shymkent qalalyq fılıa­lynyń tóraǵasy B.Narymbetov №231 ýchaskede daýys berdi. Ol referendým el úshin mańyzdy oqıǵa ekenin, ár adam óziniń quqyǵyn paıdalanyp, daýys berýge kelý kerektigin atap ótti.

Shymkent qalasynyń ákimi Ǵabıt Syzdyqbekov te óz tańdaýyn jasap, memlekettik mańyzdy isten eshbir adam shet qalmaý kerektigin eske saldy.

Osy mańyzdy oqıǵa barysynda kóptegen qyzyqty sátter oryn aldy. Máselen, kımeshek kıgen apalar daýys berý ýchaskesinde halyq ánderin tógilte shyrqady. Basyndaǵy bórik pen ústindegi shapany jarasa qonǵan qarııalar naǵyz abyz aqsaqaldarǵa uqsap jurt nazaryn ózderine qaratty. №167 daýys berý ýchaskesinde qala­lyq qýyrshaq teatrynyń ártisteri kelý­shilerdiń kóńilin kóterý maqsa­tynda qyzyqty konsert qoıdy.

Bul kúni qoǵam qaıratkerleri O.Rahmanberdıev pen Sh.Myrzah­metovter daýys berý ýchaskelerine kelip, azamattyq tańdaýyn jasady.

«Osy referendýmnan soń elde mańyzdy sheshim qabyldanady. Onyń taǵdyry qalaı bolatynyn búgingi daýys berýshilerdiń bergen daýystary sheshedi. Referendým nátıjesi qalaı bolǵan kúnniń ózinde, elge tek paıdasy tıse eken dep tileımin», dedi Sh.Myrzah-
metov.

Sıdneı Olımpıadasynyń kúmis júldegeri M.Dildábekov te daýys berdi. Ol el úshin mańyz­dy sheshim qabyldanar tus­ta nem­quraıdylyq tanytýǵa bol­maı­tyndyǵyn bildirdi. Dańqty sportshy elimizdegi osyndaı saıası oqıǵalar óziniń otbasy úshin mereke ispetti ekenin atady.

Sport demekshi, №1 olımpıada rezervin daıarlaý sport mektebindegi referendým ýchas­kesinde daýys berýshilerge gir tasyn kóterý, asyq atý sekildi ulttyq oıyndar uıymdastyryldy.

Osy kúni Qazaqstannyń kór­kem gımnastıkadan qurmetti jattyq­tyrýshysy Álııa Iýsýpova da halyq­pen birge mańyzdy sheshim qabyldaý is-sharasyna qatysty. Ol taǵdyrsheshti másele turǵanda elimizdiń árbir azamaty jeke sharýa­syn qoıyp osynaý saıası oqıǵanyń basy-qasynan tabylýǵa tıis degen oı aıtty. Sondaı-aq da­ýys berýshiler qatarynda Shymkent qalalyq opera jáne balet teatry­nyń dırektory, belgili opera ánshisi Maıra Muhamedqyzy da boldy. Ol halyqtyń talqylaýyna túsken saýalǵa óziniń qalaýyndaǵy jaýabyn berip, eldiń keleshegi úshin durys sheshim qabyldaý maqsatynda referendým ýchaskesine asyǵa kelgenin málimdedi.

Jalpy, megapolıste referendým eshqandaı zańbuzýshylyqsyz ótti. Bul sózimizdi №269 ýchaskeniń baqylaýshysy Jibek Qaýmen de qostap otyr. Onyń aıtýynsha, be­­kitilgen ýchaskede eshbir tár­tip buzýshylyq oryn almaǵan. Ýchas­­kede tirkelgen múmkindigi shek­­teýli birneshe azamatqa daýys ber­­gizý úshin referendým uıym­das­tyrýshylary úıine baryp qaıtqan.

ShYMKENT