Áskerden oralǵan jigitterdi shyǵaryp salý men kútip alý rásimi «Ońtústik» óńirlik qolbasshylyǵynyń mehanıkalandyrylǵan brıgadasy áskerı orkestriniń sherý áýenimen ótti. Osylaısha, temirjol vokzaly bir mezette úlken qýanysh pen dýmandy merekeniń alańyna aınaldy.
Vokzalda poıyz kútken jolaýshylardy kógildir beret kıgen desantshylardyń túr kelbeti erekshe qyzyqtyrdy. Jas balalar jaýyngerlerdiń qolyn alyp, bir sátte olarmen fotoǵa túsip úlgerdi. Desantshylardyń júris-turysy men kıgen kıimine erekshe nazary aýǵan jasóspirimder tezirek ásker qataryna alynyp, aǵalary sekildi kógildir berettiń ıesi bolýdy armandaǵandary sózsiz. Al Otan qorǵaý boryshyn óteýge endi attanyp ketip bara jatqan jas jigitter ýaqyt kelse de olar da osyndaı sán saltanatpen úıine abyroımen oralaryna senim bildirip, aldaǵy áskerı ómirdiń paıdaly da qyzyqty óterine úlken úmitpen qaraǵany kóz janarynan sezilip turdy.
О́z kezeginde Shymkent qalasynyń qorǵanys isteri jónindegi departamentiniń bastyǵy polkovnık Ábdiǵabıt Shegebaev áskerden qaıtqan jaýyngerlerge elge jasaǵan qyzmeti úshin, al sarbaz bolýǵa bara jatqan jastarǵa batyl júrek tanytyp erlik qadam jasaǵany úshin alǵysyn jetkizdi.
«Osydan týra bir jyl buryn biz osy temirjol vokzalynan áskerge shaqyrylylǵan 40 jas jigitti desanttyq-shabýyldaý brıgadasyna qyzmetke jibergen edik. Qarýly kúshterdiń osy bedeldi bólimshesine biz fızıkalyq jáne psıhologııalyq turǵydan jaqsy daıyndalǵan jastardy ǵana joldaımyz. Endi olar batyldyq estafetasyn óz inilerine tapsyryp jatyr. Olar úshin bul –umytylmas sát», dedi qorǵanys isteri jónindegi departament bastyǵy polkovnık Á.Shegebaev.
Al balalaryn batyl ul qylyp tárbıelegen sarbazdardyń ata-analaryna «Qarýly kúshter ardagerleri» respýblıkalyq qoǵamdyq birlestiginiń tóraǵasy, otstavkadaǵy polkovnık Serikbaı Ońbaev erekshe alǵysyn bildirdi.
«Biz balalardy bir vokzaldan jáne bir poıyzben qarsy alyp, shyǵaryp salyp jatyrmyz. Keshe ǵana áskerge ketken jas bala búgin kúshi tolysqan, oıy eseıip kádimgideı úlken er azamatqa aınalǵan jigitterdi kórip otyrmyz. Olar ata-anasynyń, týystarynyń aldynda bala sekildi edi, búgin mine, áskerden oralyp, el qorǵaýǵa daıyn naǵyz qazaqtyń batyry bolyp keldi. Osyndaı tamasha uldardy kórip qalaı rıza bolmassyń, qalaı tamsanbassyń! Árıne, jas sarbazdardyń minezdi tulǵaly jaýyngerlerge aınalýyna komandırlerdiń, serjant, nusqaýshylardyń eńbegi kóp. Degenmen sarbazdar da ózin-ózi tárbıeleý úshin kóp jumys istedi», dedi ardager.
Álbette, vokzaldy bolǵan shattyqty kórinisti aýyzben aıtyp jetkizý qıyn. Qansha degenmen jaýyngerler de, olardyń ata-analaryna da bir-birin saǵynysyp qalǵany júzinen kórinip turdy. Sarbazdardyń dostary da bul dýmannan shet qalmaı, qımas baýyrlaryn qaýmalaı qorshap, tipti barlyǵy birge tóbesine qaraı laqtyryp, kóńil kóterip jatty. Bul uzaq ýaqyt jyraqta júrip, Otan qorǵaý jolynda qyzmet atqaryp, óz mindetin aman-esen atqaryp kelgen sarbazdardyń ómirindegi eń qyzyqty da umytylmas shaǵy bop qalary sózsiz.
ShYMKENT
