Foto: Sý resýrstary jáne ırrıgasııa mınıstrligi
Qyzylorda oblysy boıynsha «Qazsýshar» fılıaly bıylǵy sýarý maýsymynda sharýalarǵa 3,7 mlrd tekshe metr sý berdi. Kóktemde mekeme 965 sý paıdalanýshymen 127 myń gektar egis alqabyn sýmen qamtamasyz etý jóninde kelisimshartqa otyrdy. Onyń ishinde 84,2 myń gektary - kúrish alqaby.
«Bıyl Qyzylorda oblysy sýarý maýsymyn tabysty aıaqtady. Dıhandardan sý jetispeýshili týraly shaǵym túsken joq. Sý shyǵynyn azaıtý maqsatynda jyl basynan 25 sý ólsheý beketin jańarttyq. Kelesi jyly taǵy 58 beketti qalpyna keltirýdi josparlap otyrmyz. Bul sý kólemin dál esepteýge múmkindik beredi», dedi Qyzylorda oblysy boıynsha «Qazsýshar» fılıaly basshysynyń orynbasary Aıdos Asanbaev.
Sýdan tapshylyq kórmegenderin jergilikti dıhandar da rastap otyr. Sýdyń turaqty berilýine baılanysty bıyl kúrish ónimdiligi de artqan.
«Bıyl sýdan tapshylyq bolǵan joq, eshqandaı másele týyndamady. Osyǵan deıin 3 jyl qatarynan qıyn bolǵan edi. Sý jetpeı, kezektesip alatyn edik. Osy jyly úlken kanaldardyń bárin tazartty, shlıýzder ornatty. Jaqsy jumys jasady. Orta eseppen gektarynan 50 sentnerden ónim alýdy josparlap otyrmyz», dedi sharýa qojalyǵynyń basshysy Danabek Ábdibekov.
