Mádenıet Bespaev – Pavlodar oblysy Ertis aýdany Qosaǵash shaǵyn aýlynyń týmasy. Bala kezinen Mádenıet fızıkaǵa, ǵaryshqa qatysty barlyq nársege qyzyǵatyn: «Ǵarysh týraly ensıklopedııa meniń ǵalamdy zertteýge degen súıispenshiligimdi oıatty. 7-synypta Pavlodar qalasyndaǵy fızıka-matematıka baǵytyndaǵy Nazarbaev zııatkerlik mektebine oqýǵa túsip, ony úzdik bitirdim. Emtıhandardy sátti tapsyryp, NU-ǵa «Mehanıkalyq jáne aeroǵaryshtyq ınjener» mamandyǵyna tústim. Osylaısha, qyzyǵýshylyǵym men hobbıime tolyq sáıkes keletin mamandyqty osy ýnıversıtetten taptym. Sondaı-aq NU-dy tańdaýdyń negizgi sebepteriniń biri onyń joǵary mártebesi ári stýdentterine jeke jáne kásibı ósýge beretin múmkindikteri boldy», deıdi stýdent.
M.Bespaev bakalavrıat bitirgennen keıin osy ýnıversıtette magıstratýrada oqýyn jalǵastyrýdy uıǵarady. Ol NU-da alǵan bilimi onyń tamasha maman bolýyna septigin tıgizetinine senimdi.
NU-ǵa úmitkerlerdiń kópshiligi grant boıynsha oqıdy, olar úzdik oqysa, stıpendııa da beriledi. NU-ǵa túsýge aýyldyq kvota joq, aýyldyq talapkerler teń sharttarmen qabyldanyp, eń daryndy balalar elimizdiń jetekshi JOO-ǵa túsedi.
NU stýdentterge zertteýshilerge óte mańyzdy Q1 deńgeıindegi bedeldi ǵylymı jýrnaldarda jarııalaý múmkindigin beredi. Stýdentter ǵylymdaǵy alǵashqy qadamyn professorlarymen birge senimdi túrde jasaıdy, basqa ýnıversıtetterde ondaı múmkindik joq. Stýdentter birinshi kýrstan bastap ǵylymı jobalarǵa qatysyp, úzdik oqytýshylardyń jetekshiligimen tájirıbe, bilim alady. Bul zertteý daǵdylaryn damytýǵa, ǵylymnyń ártúrli salasyn tereń túsinýge kómektesedi. Stýdentter halyqaralyq konferensııalarǵa qatysyp, ataqty zertteýshilermen yntymaqtasa alady. 2023 jyly NU stýdentteri 300 ǵylymı maqalanyń avtory, olardyń 64%-y bedeldi Q1 jýrnaldarynda jarııalandy. Bul stýdentter zertteýleriniń joǵary deńgeıin, kásibı qyzmetke daıyndyǵyn kórsetedi.
Mádına Amankeldınova Shyǵys Qazaqstan oblysynyń Zaısan qalasynda ósip, Zaısandaǵy H.Mustafına atyndaǵy orta mektepti bitirgen. Oǵan eń qıyny aǵylshyn tilin meńgerý edi, al Mádına óz betimen daıyndaldy. Eńbekqorlyǵymen grantqa ıe bolyp, qazir kompıýterlik ǵalymdar baǵytynda oqyp jatyr. «Men NU-dy tańdadym, óıtkeni elimizde osy jerde ǵana halyqaralyq deńgeıde bilim ala alatynymdy túsindim, sonymen qatar munda sheteldiń eń jarqyn, eń órshil jastary jınalǵan óte sapaly qoǵamdastyq bar».
Ýnıversıtet stýdentteriniń daryndylyǵyn qoldaýǵa, damytýǵa, olarǵa bilim alý men ósýge biregeı múmkindik berýge umtylady. Atalǵan joǵary oqý orny árbir izdenýshiniń stýdenttik ómirge qatysý arqyly áleýetin tolyq ashatyn qolaıly ortany qamtamasyz etedi. Stýdenttik úkimet, sport klýbtary (olardyń sany 80-nen asady), túrli bastama stýdentterge ýnıversıtet ómirine belsene aralasyp, kóshbasshylyq qabiletterin damytýǵa jaǵdaı jasaıdy.
Ýnıversıtettiń basty maqsaty – óz túlekterine elimizdiń damýyna belsendi qatysýy úshin tabysty mansapqa qajetti bilim men daǵdylardy berý. Ýnıversıtette Abaı fılosofııasyna negizdelgen «Tolyq adam» tárbıe jumysynyń tujyrymdamasynda stýdentterdiń boıynda izgilik, zerdelilik, sanaly kúsh-qýatty damytýdyń mańyzdylyǵy kórsetilgen.
Qurylǵannan beri NU ártúrli salada, sonyń ishinde ınjenerııa, ǵylym, gýmanıtarlyq ǵylymdar, medısına, bıznes, bilim berý, memlekettik saıasatta tabysqa jetken 10 000-nan asa stýdentti daıarlady. Jumyspen qamtylǵan túlekterdiń 90%-dan astamy elimizdiń ekonomıkalyq, áleýmettik damýyna óz úlesin qosyp keledi.
