«Jasyl» baǵdarlamamyz Bakýde tanystyryldy

Qazaqstannyń Ázerbaı­jan­daǵy elshisi Álim Baıel Qazaq­standa júzege asyrylyp jatqan klımattyń ózgerýine, ekologııalyq problemalarǵa jáne sý tapshylyǵyna qatys­ty sha­ralarǵa toqtaldy. Ol eli­miz­diń halyqaralyq klımat­tyq kelisimder boıynsha mindette­melerin oryndaý boıynsha ju­mys júrgizip jatqanyn ári turaq­­ty damý maqsattarynyń ulttyq kún tár­tibiniń quramdas bóligine aınalǵanyn atap ótti.

Osy turǵyda Á.Baıel Qazaq­stan 2030 jylǵa qaraı parnıktik gazdar shyǵaryndylaryn naqty 15%-ǵa azaıtýdy, al múmkin bolyp jatsa, muny halyqaralyq qarjy ınstıtýttarynyń eleýli qoldaýymen 2030 jylǵa qaraı 25%-ǵa azaıtýdy josparlap otyrǵanyn aıtty.

Sonymen qatar elshi Prezı­dent Qasym-Jomart Toqaevtyń bastamasymen Kaspıı teńiziniń ekojúıesin ári sútqorekti­lerin, sonyń ishinde Kaspıı ıtbalyǵynyń tirshilik etý ortasyn qorǵaý úshin el tarıhynda tuńǵysh qorǵalatyn teńiz tabıǵı aýmaǵyn qurý jobasyna erekshe toqtaldy.

Dıplomattyń aıtýynsha, elimiz­diń «jasyl» kún tártibin ilgeriletý jónindegi ustanymyn Memleket basshysynyń 2026 jyly BUU jáne halyqaralyq uıymdardyń qamqor­lyǵymen Qazaq­standa Aımaqtyq klımat­tyq sammıtti ótkizý týraly bas­tamasy da rastaıdy.

«Sondaı-aq biz Ortalyq Azııa úshin klımattyń ózgerýi men jasyl energetıka jónindegi Jobalyq keńseni quryp jatyrmyz, bul rette áriptesterimizdi osy bastamany qoldaýǵa shaqyramyz», dedi Á.Baıel.

Konferensııaǵa qatysýshylar Qazaqstannyń Halyqaralyq Aral­dy qutqarý qoryndaǵy tóraǵa­lyǵynyń basymdyqtary týra­ly habardar boldy. Elshiniń aıtýyn­sha, basymdyqtar Ortalyq Azııa aı­maǵynyń ekojúıeleri men bar­lyq elderiniń múddeleri eskeri­le otyryp júzege asyrylady. Osy rette dıplomat Qazaq­stannyń óz kúshimen Soltústik Araldy qutqarý isinde edáýir jetis­tikke qol jetkizgenine nazar aýdardy.

Bakýda ótetin BUU-nyń Klı­mattyń ózgerýi jónindegi negiz­demelik konvensııasy taraptary konferensııasynyń 29-sessııasyna (COP29) toqtalǵan Á.Baıel Qazaqstan osy is-sharany uıymdastyrý máselesine belsendi atsalysatynyn aıtty. Bul rette ol jınalǵandarǵa detaldary aldaǵy COP29 sammıtinde jarııalanatyn Ortalyq Azııadan Ázerbaıjan arqyly Eýropaǵa jasyl elektr energııasyn eksporttaý boıynsha Qazaqstan, Ázerbaıjan jáne О́zbekstan arasyndaǵy iri birlesken joba týraly aıtyp berdi.

Sondaı-aq sımpozıýmda Ázer­baıjan Energetıka mı­nıstriniń orynbasary Elnýr Sol­tanov, Majarstan elshisi Tomash Torma, Italııa elshisi Lýka dı Djanfranchesko sóz sóıledi. Odan keıin ǵalymdar men mamandar sý resýrstaryn qorǵaý jáne klımattyń ózgerýi máseleleri boıynsha baıandamalar jasap, qajetti sharalardy talqylady. Bizdiń elimizden «Jasyl Damý» AQ-nyń sarapshysy, geografııa ǵylymdarynyń doktory Aleksandr Cherednıchenko baıandama jasady.