Májiliste Ulttyq Assambleıa delegasııasyn qarsy alǵan Erlan Qoshanov dıplomatııalyq qarym-qatynas ornaǵan jyldar ishinde elderimiz kóptegen baǵytta strategııalyq áriptestikti nyǵaıtýda mol tabysqa jetkenine nazar aýdaryp, bul eki eldiń kóshbasshylary – Qazaqstan Prezıdenti Qasym-Jomart Toqaev pen Koreıa Prezıdenti Iýn Sok Ioldiń kúsh-jigeriniń nátıjesi ekenin atap ótti.
– Biz óz tarapymyzdan memleketterimizdiń basshylary qol jetkizgen kelisimderdiń zańnamalyq deńgeıde bekitilýin qamtamasyz etýge bar kúshimizdi salyp jatyrmyz. Elderimizde bolyp jatqan mańyzdy transformasııalyq úderisterdi eskerip, zańnama salasynda tájirıbe almasýǵa basymdyq berip otyr. Biz ekijaqty parlamentaralyq yntymaqtastyqty odan ári nyǵaıtýǵa múddelimiz. Sizderde de dál osyndaı nıet bar ekenin kórip otyrmyz, – dedi Májilis tóraǵasy.
О́z sózinde Ý Von Shık Qazaqstanda bolyp jatqan barlyq saladaǵy iri ózgeristerge mán berdi. Ulttyq Assambleıa spıkeri eki el depýtattary arasynda qalyptasqan tikeleı dıalogti atap ótip, bul barlyq deńgeıdegi jan-jaqty áriptestik qarym-qatynasty arttyrýǵa jaqsy negiz bolatynyn aıtty.
Májilis tóraǵasy koreılik áriptesin elimizde júrgizilip jatqan aýqymdy saıası reformalardyń barysy men segizinshi shaqyrylymdaǵy Parlament jumysy týraly málimet etti. Erlan Qoshanov búginde Májilistegi alty partııalyq fraksııa men bir mandatty okrýgterden saılanǵan depýtattar Qazaqstan qoǵamynyń barlyq múdde-pikirin qamtyp otyrǵanyn jetkizdi. Al bılik tarmaqtary «Kúshti Prezıdent – yqpaldy Parlament – esep beretin Úkimet» saıası modeli aıasynda halyqtyń suranysyn eskere otyryp, ózara tıimdi is-áreket jasaıdy.
Taraptar Parlament Májilisi men Ulttyq Assambleıa janyndaǵy dostyq toptary aıasynda da, Ortalyq Azııa elderi jáne Koreıa Respýblıkasy parlamentteri spıkerleriniń «Bes plıýs bir» forýmy formatynda da parlamentaralyq baılanystardy odan ári damytý máselelerin talqylady.
Parlament ókilderiniń dıalogi Ashhabadta ótetin kezekti forýmda jalǵasady.
