Komıtet tóraǵasy Ashat Aımaǵambetov jetekshilik etken otyrysqa depýtattarmen qatar bilim salasy mamandary, sarapshylar, memlekettik organ ókilderi qatysty. Basqosýda Oqý-aǵartý mınıstrligi Orta bilim berý komıtetiniń tóraǵasy Qanybek Jumashev ár 5-7 jyl saıyn oqý baǵdarlamalaryn qaıta qaraý kerektigin, bul bilim berý júıesiniń qoǵamnyń ýaqyty men qajettiligine der kezinde jaýap berýine yqpal etetinin atap ótti.
– Jańa memlekettik standarttardy engizý bilim berý saıasatyndaǵy jahandyq trendterdi kórsetedi. Iаǵnı synı oılaý, analıtıkalyq daǵdylar jáne problemalardy sheshýge ınnovasııalyq kózqaras sekildi quzyretterdi damytýǵa baǵyttalǵan. Oqý baǵdarlamalaryn qaıta qaraýda otandyq jáne halyqaralyq úrdister eskeriledi. Bul oqýshylardyń akademııalyq bilimin ǵana emes, fýnksıonaldyq saýatyn, aqparattyq-kommýnıkasııalyq tehnologııalardy joǵary deńgeıde meńgerýin qalyptastyrýǵa arnalǵan. Bilim standarttary sheńberinde oqý úderisine sıfrlyq tehnologııalardy engizýge erekshe kóńil bólinip keledi. Ár oqýshy bastaýysh bilim berý kezeńinde meńgerýi kerek bilimge, bilikke jáne daǵdylarǵa qoıylatyn talapqa saı qamtylǵan. Buǵan til jáne ádebıet, matematıka, ınformatıka, jaratylystaný, tehnologııa jáne óner, deneshynyqtyrý sııaqty negizgi oqý pánderi boıynsha pándik quzyrettilikti damytý kiredi. Bul tásil oqýshylardyń akademııalyq jáne ómirlik daǵdylaryn júıeli qalyptastyrýǵa múmkindik beredi, – dedi Q.Jumashev.
Májilistiń Áleýmettik-mádenı damý komıtetiniń múshesi Juldyz Súleımenova Oqý-aǵartý mınıstrligi Y.Altynsarın atyndaǵy ulttyq bilim akademııasymen birlesip oqý baǵdarlamalarynyń jańa standartyn jasaýǵa kiriskenimen áli nátıje baıqalmaı otyrǵanyna toqtaldy.
– 2015 jyly jańa standart engizilip, 2016 jyly mektepterimiz sol negizde oqı bastady. Menińshe, bilim sapasynyń kúrt tómendep ketýi qundylyqtarymyzdyń bilim salasynda birtutas uıyspaýynan bolyp otyr. Sonymen qatar qazirgi tańda aýyl mektepteri men qala mektepteriniń bilim sapasyndaǵy aıyrmashylyq tereńdep bara jatyr. Bizde 500-den asa ınnovasııalyq mektep bar, bul – zııatkerlik mektepter, bilim ınnovasııa lıseıleri, Binom mektepteri. Onda balalar óte jaqsy bilim alady. Biraq kópshiligi oqýǵa shetelge ketedi. Qazaqstanǵa kelip, eńbek naryǵyna jumys isteıtin – aýyl mektebiniń balalary. Al jaı mektepter men osy ınnovasııalyq mektepterdiń bilim baǵdarlamalaryn salystyratyn bolsaq, óte úlken alshaqtyq bar, – dedi J.Súleımenova.
Otyrysqa qatysýshylar jańa bilim standartyn jetildirýge qatysty saýaldaryn ortaǵa salyp, tárbıe jumystaryn uıymdastyrý, bastaýysh mektep oqýshylaryna orys tili pániniń baǵdarlamasyn jeńildetý, qazaq tili grammatıkasyn birizdendirý, kitaptardyń kólemin bir standartqa keltirý, balalardyń jasyna laıyq tapsyrmalar berý, oqýshylardyń logıkalyq, sıfrlyq daǵdylaryn jetildirý jáne basqa da máselelerdi jan-jaqty talqylady.
