Foto: Vedomstvo. Telegram
Mınıstrliktiń «Qazsýshar» kásipornynda 67 sýshylar áýleti jumys isteıdi. Olardyń basym bóligi - 25 áýlet Q.Sátpaev atyndaǵy kanalda eńbek etedi. Jambyl oblystyq fılıalda - 19, Túrkistan oblystyq fılıalda - 8, Jetisý oblysynda - 6, Qyzylordada – 3, Aqtóbe oblysynda - 2 sýshylar áýleti bar. Batys Qazaqstan, Aqmola, Soltústik jáne Shyǵys Qazaqstan oblystarynda sýshylardyń 1 áýletinen bar.
Eń kóp sýshy shyqqan áýlet - Shamshıevter áýleti. Aqmola oblystyq fılıalda bir otbasydan 7 maman jumys istegen. Búginde atalary bastaǵan qyzmetti nemereleri jalǵastyrǵan.
Tasqyn kezinde kózge túsip, Memleket basshysynan marapat alǵan Sh.Ábdıev te sýshylar áýletiniń negizin salýshy. Búginde onyń inisi men kelini, balasy Aqtóbe oblysy boıynsha «Qazsýshar» fılıalynyń ýchaskelerinde jumys isteıdi.
«Biz elimizdiń sý sharýashylyǵynda qyzmet etip júrgen áýletterdi maqtan tutamyz jáne olardyń eńbegin joǵary baǵalaımyz. Ákeden balaǵa, atadan nemeresine jalǵasyp kele jatqan urpaqtar sabaqtastyǵy bilim men tájirıbe almasý úshin de óte mańyzdy», dedi Sý resýrstary jáne ırrıgasııa mınıstri Nurjan Nurjigitov.
