Parlament basshylarynyń kezdesýi «Beıbitshilik, órkendeý jáne ózara senim jolyndaǵy seriktestik» atty plenarlyq sessııadan bastaldy. О́z sózinde Májilis tóraǵasy Erlan Qoshanov qazirgi jahandyq klımattyq, demografııalyq syn-qaterlerdiń beleń alýy, qaqtyǵystardyń ýshyǵýy, memleketter arasyndaǵy shıelenister men senimsizdiktiń órshýi jaǵdaıynda usynylǵan taqyryptyń ózektiligin atap ótti.
– Qazirgi kezde Ortalyq Azııa birtutas óńir retinde damýdyń jańa kezeńin bastan keship jatyr. Qazaqstan Qasym-Jomart Toqaev ony «Ortalyq Azııanyń renessansy» dep atady. Qazaqstan aımaqtyń Koreıamen senimdi saıası dıalogti, ekonomıkalyq, ınvestısııalyq baılanystardy damytýmen qatar, parlamenttik dıplomatııany da nyǵaıtýǵa múddeli. Bizdiń elimizdi ósip-órkendeý jáne jaıly qoǵam qalyptastyrý jolyndaǵy ortaq maqsattar biriktiredi. Beıbitshilik pen turaqtylyq aımaq elderi men Ońtústik Koreıa arasyndaǵy berik seriktestiktiń myzǵymas negizi bolýǵa tıis, – dedi Májilis spıkeri.
Sonymen qatar E.Qoshanov Ortalyq Azııa elderi men Koreıa Respýblıkasynyń tuńǵysh parlamenttik forýmy elderimiz úshin tıimdi sheshimder qabyldaýǵa múmkindik beretin jumys alańyna aınalǵanyn atap ótti. Tabıǵı resýrstarǵa baı, ekonomıkasy ósip kele jatqan Ortalyq Azııa aımaǵy men tyń tehnologııalary, ınnovasııalary bar Ońtústik Koreıa birin-biri tolyqtyra alady. Osyǵan baılanysty sıfrlandyrý men kreatıvti ındýstrııa salasynda, sondaı-aq Eýropa men Azııa, Ortalyq jáne Shyǵys Azııa arasyndaǵy kólik-tranzıt áleýeti máselelerinde yntymaqtastyqtyń úlken baǵyttaryna jol ashylyp otyr.
Májilis spıkeri áriptesterin óńirdiń bıo jáne ekojúıesin saqtaý, klımat ózgerýi máselesin sheshý, sonymen qatar sý qaýipsizdigi men energetıkalyq qaýipsizdikti qamtamasyz etý baǵytynda kúsh-jigerdi biriktirýge shaqyrdy. Ol Ortalyq Azııa elderiniń sý-energetıka konsorsıýmyn qurý jáne 2026 jyly elimizde Birikken Ulttar Uıymy aıasynda О́ńirlik klımattyq sammıt týraly Qazaqstan bastamasynyń ózektiligine nazar aýdardy. Onyń pikirinshe, Qazaqstan Prezıdentiniń bastamasymen Almatyda Ortalyq Azııa elderiniń Qorshaǵan ortany qorǵaý jáne klımattyń ózgerýi jónindegi jobalyq ofısiniń aıasynda birlesken jumysty kúsheıtý qajet.
Ortalyq Azııa memleketteri men Koreıa Respýblıkasy parlamentteri tóraǵalary forýmynyń qorytyndysy boıynsha birlesken deklarasııa qabyldandy.
Is-sharaǵa Koreıa Respýblıkasy Ulttyq Assambleıasynyń tóraǵasy Ý Von Shık, Túrikmenstan Medjlısiniń tóraǵasy Dýnıagozel Gýlmanova, Qyrǵyz Respýblıkasy Jogorký Keneshiniń tóraǵasy Nýrlanbek Shakıev, Tájikstan Respýblıkasy Madjlısı Namoıandagon Madjlısı Olı tóraǵasy Mahmadtoır Zokırzoda, О́zbekstan Respýblıkasy Olıı Májlısiniń Zań shyǵarý palatasynyń tóraǵasy Nýrıddın Ismoılov jáne forýmǵa qatysýshy elderdiń parlamentshileri qatysty.
Osy kúni Májilis spıkeri Erlan Qoshanov Túrikmenstan Medjlısiniń tóraǵasy Dýnıagozel Gýlmanovamen kezdesti. Eki el arasyndaǵy parlamentaralyq yntymaqtastyqtyń ózekti máseleleri jáne zań shyǵarý jumystary boıynsha tájirıbe almasý jaıy talqylandy. Túrikmenstan tarapyna Qazaqstandaǵy saıası reformalardyń júzege asyrylý barysy men Májilis jumysynyń qorytyndylary týraly aqparat berildi.
