Borodýlıha aýdany Novopokrovka aýylynda uıymdastyrylǵan senbilikte jergilikti turǵyndar men mekeme, kásiporyn ókilderi Jýra ózeniniń arnasyn qalyń qamystan tazartyp, sý aǵynyn jaqsartýǵa, kóktemgi sý tasqyny qaýpin azaıtýǵa atsalysty. Aksııaǵa tek jergilikti turǵyndar ǵana emes, bıýdjettik mekemelerdiń qyzmetkerleri, stýdentter men oqýshylar qatysty. Novopokrovka aýyldyq okrýgi aqsaqaldar keńesiniń tóraǵasy Anatolıı Romanov mundaı is-sharalardyń qoǵamdyq mán-mańyzyna toqtalyp, týǵan jerge qamqorlyq jasaý ár adamnyń mindeti ekenin basa aıtty.
Dál osyndaı is-shara Maqanshy, Úrjar, Jarma, Aqsýat, Abaı, Kókpekti, Aıagóz aýdandarynda da ótip, saıabaqtardyń sáni kirip, qoǵamdyq oryndar qoqystan tazartyldy. Is-shara barysynda Besqaraǵaı aýdanynyń ortalyǵynda jańa saıabaqtyń qurylysy da aıaqtaldy. Saıabaqta balalar oıyn alańy, LED-ekran, sahna, tennıs, shahmat ústelderi oryn alǵan. 150 qaraǵaı men sheten aǵashtary otyrǵyzylyp, 42 sham ornatyldy.
Abaı oblysy ákiminiń baspasóz qyzmeti usynǵan derekke súıensek, «Taza Qazaqstan» baǵdarlamasy júzege asyryla bastaǵannan beri aksııaǵa oblysta 100 430 adam, onyń ishinde 3 626 uıym men mekeme ókilderi aralasqan. Jumysqa 2 087 birlik tehnıka jumyldyryldy. Nátıjesinde, 99 023 aýla tazalanyp, 55 131 tonna qatty turmystyq qaldyq qoqys polıgondaryna jetkizildi. Oblys kóleminde 239 saıabaq pen skver tazartylyp, 313 eskertkishtiń aınalasy abattandyryldy, 741 sharshy metr tasjol jóndeldi. Senbilikterge 1 077 áleýmettik, 2 261 óndiristik nysan, sondaı-aq 934 jasandy sý qoımasy qamtyldy.
Semeı qalasynda «Taza Qazaqstan» aksııasy aıasynda keıingi ótkizilgen senbilikke 8000-nan astam qala turǵyny qatysty. Senbilik barysynda qala aýmaǵy 14 ýchaskege bólinip, ár ýchaskege Semeı qalasy ákimdiginiń derbes bólimderi baqylaý jasady. Qalanyń túrli shaǵyn aýdandarynda, kóshe, aýlalarynda qoqys jınaý, jasyl aýmaqtardy abattandyrý, tazalaý jumysy júrgizildi.
Abaı oblysy
