Keńes tóraǵasy Meles Seıitjanov qala ákimdigi tarapynan óńirge ınvestorlar tartylyp jatqanyn, ol úshin barlyq tıisti sharalar qabyldanǵanyn jetkizdi. Sondaı-aq jańa ındýstrııalyq aımaqtar qurylǵanyn, sońǵy jyldary shahar sáýlet jaǵynan jaqsara túskenin, ásirese týrızmdi damytý úshin kóptegen jumys atqarylǵanyn atap ótti. Ol ınvestısııa salasynda osy kúnde biraz iri jobalar qolǵa alynǵanyn aıtyp, sonyń nátıjesinde aýqymdy óndiris oryndary ashylǵanyn tilge tıek etti.
Osy jıynda kásipkerler palatasy dırektorynyń orynbasary Maııa Isaeva sóz alyp, Shymkenttegi AEA-nyń qala ekonomıkasyn órkendetýge qosqan úlesin baıandap berdi.
«2022 jyly Memleket basshysy Qasym-Jomart Toqaevtyń tapsyrmasymen arnaıy ekonomıkalyq aımaqtardy damytý jónindegi Jol kartasy bekitildi. Qazirgi tańda bul – basty strategııalyq qujat. Sondyqtan ol barlyq múddeli taraptar men ekonomıkalyq aımaqtardyń jumysyn júıeleıdi. Osy tusta aıta ketý kerek, «Ońtústik» AEA tek megapolıstiń emes, elimizdegi tabysty arnaıy ekonomıkalyq aımaqtardyń biri sanalady. Oǵan salynǵan ınvestısııa – 60 mıllıard teńge bolsa, óndiris kólemi – 156,4 mıllıard teńgeni quraıdy. Aımaqty qurýǵa ketken bıýdjettiń 1 teńgesine 7,4 teńge ınvestısııa quıylǵan. Buǵan qosa AEA kásiporyndary Salyq kodeksine sáıkes túrli salyqtyq jeńildikterdi qoldanady», dedi ol.
Keńes otyrysynda Shymkent qalasy prokýratýrasy basqarmasynyń basshysy Baqytjan Baıǵozıev «Ońtústik» AEA kásiporyndarynyń jer ýchaskelerin alýdaǵy problemalary týraly baıandady.
«Kún tártibinde qaralǵan másele shynymen de kúrdeli. Arnaıy ekonomıkalyq aımaqty qurýdaǵy basty maqsat – óńirdi jedel damytý, óte tıimdi, básekege qabiletti óndiris oryndaryn qurý edi. Zańǵa sáıkes arnaıy ekonomıkalyq aımaqtyń basqarýshy kompanııasy AEA qatysýshylaryna aqyly negizde ýaqytsha paıdalanýǵa jer ýchaskelerin berýge tıis. Prokýratýra tekserý júrgizý nátıjesinde ınvestısııalyq túrli qoldaýlarǵa qaramastan, basqarýshy kompanııa tarapynan jer ýchaskelerin AEA qatysýshylaryna berý barysynda ártúrli ákimshilik kedergi jasalǵanyn anyqtaǵan. Sonyń saldarynan ınvestorlar óz mindettemelerin kelisimshartta belgilengen merzim ishinde oryndaı almaı jatyr. Prokýratýranyń aralasýymen AEA-nyń eki kásipkerine jer ýchaskeleri berildi. Anyqtalǵan zań buzýshylyqtar boıynsha prokýratýra arnaıy akt túzetin bolady», dedi B.Baıǵozıev.
О́z kezeginde «Ońtústik» arnaıy ekonomıkalyq aımaǵynyń basqarýshy kompanııasy» AQ basqarma tóraǵasy Ǵanıbet Áýbákirov kásipkerlerge bólinetin jer ýchaskeleriniń qujattaryn rásimdeý barysyndaǵy merzimderdiń sozylyp ketý sebebin túsindirip berdi.
«Kásiporyndardyń jer ýchaskeleriniń memlekettik aktilerin rásimdeý úshin halyqqa qyzmet kórsetý ortalyqtaryna qujat tapsyrylady. HQKO-da rásimdeý ýaqyty sozylatyndyqtan bizdiń jumys kóp jaǵdaıda kesheýildep jatady. Reglament boıynsha ol 14 kún ýaqytty alady. Biraq shyn mánisinde merzim odan da asyp ketip jatady. Onyń birden-bir sebebi – qujat rásimdeýdiń qıyndyq týdyrar tustary kóp. Kásipkermen kelisimshart jasalǵan soń jer ýchaskesiniń qujattaryn rásimdeý merziminiń tym keshigip ketetini sondyqtan», dedi basqarma tóraǵasy.
Basqosýda keńes músheleri atalǵan keleńsizdikterdi boldyrmaý úshin qujat rásimdeýdiń naqty ári túsinikti algorıtmin qurý kerektigin alǵa tartty. Sondaı-aq ınvestısııalyq jobalardy júzege asyrýǵa, olardy qoldaýǵa barynsha jaǵdaı jasaý qajettigine toqtaldy.
Sonymen, joǵarydaǵy máselelerdi talqylaı kele keńes mynadaı qorytyndy jasap, usynystardy ázirledi. Birinshiden, Shymkent qalasynyń prokýratýrasyna kásipkerlerdiń quqyqtaryn buzýǵa jol bergen laýazymdy tulǵalardy jaýapkershilikke tartý máselesin qaraýǵa tıis. Ekinshiden, kásipkerler palatasy qalalyq prokýratýramen, kásipkerlik, ındýstrııalyq-ınnovasııalyq damý basqarmasymen birge kásipkerlerge ınvestısııalyq jobalardy ýaqtyly iske asyrýyna jan-jaqty qoldaý kórsetýi kerek. Úshinshiden, qalalyq kásipkerlik, ındýstrııalyq-ınnovasııalyq damý basqarmasyna zańnamada kózdelgen naqty merzimderdi kórsete otyryp, AEA qatysýshylary úshin jer ýchaskelerin berý boıynsha ınvestısııalyq jobalardy iske asyrýdyń qadamdyq algorıtmin ázirleý mindetteldi. Eń sońǵysy «Ońtústik» AEA kásipkerlerine jer ýchaskelerin bólýdegi kedergilerge qatysty qalalyq sybaılas jemqorlyqqa qarsy is-qımyl departamentine arnaıy hat joldanatyn boldy.
ShYMKENT
