Bıylǵy 14 qazanǵa deıingi málimetke sáıkes, 12 530 adam arnaýly áleýmettik kómek alýǵa ótinish jazǵan. Eńbek jáne halyqty áleýmettik qorǵaý mınıstrligi 11 814 azamatqa zııandy eńbek jaǵdaılarynda uzaq ýaqyt jumys istegen adamdarǵa arnalǵan arnaýly áleýmettik tólem (AÁT) taǵaıyndalǵanyn jarııa etti.
Eki kózden, ıaǵnı el bıýdjeti men Biryńǵaı jınaqtaýshy zeınetaqy qorynan tólenetin arnaýly áleýmettik tólem alýǵa 3 077 adam ótinish jazyp, onyń ishinde 2 963 adamǵa taǵaıyndaldy. Al respýblıkalyq bıýdjet, Biryńǵaı jınaqtaýshy zeınetaqy qory, jumys berýshi, ómirdi saqtandyrý uıymy syndy tórt qarjylandyrý kózinen áleýmettik tólem alýǵa 8 928 adam ótinish jazyp, onyń ishinde 8 851 azamattyń qujaty ótken. Munyń syrtynda 474 azamat saqtandyrý kompanııasymen zeınetkerlik annýıtet shartyn jasaspaq. 51 azamat uıaly telefonyna joldanǵan SMS habarlamaǵa jaýap bermegen. Mindetti sharttardy oryndamaǵandyqtan, 191 ótinish berýshige AÁT taǵaıyndalmapty.
О́ńirlerde arnaýly áleýmettik tólemderdi alýǵa ótinish bildirgenderdiń eń kóbi Qaraǵandy oblysynda tirkeldi. 2 kózden – 528, 4 kózden 1 598 adam tirkelse, Qostanaı oblysynda AÁT alýǵa 2 kózden – 334, al 4 kózden 1 057 adam qujatyn ótkizgen. Shyǵys Qazaqstan oblysynan 2 kózden tólem alýǵa – 275, 4 kózden beriletin járdemge 1 063 adam muqtaj retinde tirkelipti.
Bıylǵy 1 qańtardan bastap elimizde zııandy eńbek jaǵdaıynda uzaq ýaqyt jumys istegen adamdarǵa arnaýly áleýmettik tólem tólenedi. Arnaýly áleýmettik tólemge ótinish joldaýshylardyń 55 jasqa tolýy, Biryńǵaı jınaqtaýshy zeınetaqy qorynda (BJZQ) keminde 7 jyl kásiptik zeınetaqy aýdarymdarynyń qarajaty bolýy mindetti. Tólem zeınetkerlik jasqa deıin tólenedi. Arnaýly áleýmettik tólemderdi alýshylar eńbek jaǵdaılary zııandy jumystarmen aınalyspaýǵa tıis. Jumyskerler jeńil jumysqa aýysa alady, sodan keıin olar jalaqy men tólem alady nemese demalysqa shyǵyp, zeınetke shyqqanǵa deıin arnaýly áleýmettik tólem alyp turady.
BJZQ derekterine sáıkes, arnaýly áleýmettik tólemdi taǵaıyndaýǵa mindetti sharttardy eskere otyryp, oǵan 2024 jyly 37 myńnan astam jumysker úmitker retinde ótinishin joldaýyna bolady. Tólemniń ortasha mólsheri 208 myń teńgeden asady. Árbir jumyskerge tólem mólsheri BJZQ-daǵy jınaqtaryna baılanysty esepteledi. Áleýmettik kodekske sáıkes jumys berýshiler kásipteri men qyzmet túrlerinde densaýlyqqa zııandy ári aýyr jumystarmen aınalysatyn jumyskerlerdiń kásiptik zeınetaqy jarnasyn aýdarady.
Arnaýly áleýmettik tólem ekonomıkanyń 17 salasynda, onyń ishinde taý-ken óndirý, óńdeý ónerkásibinde, ózge de óndiriste jumys isteıtin azamattarǵa beriledi.
