Foto: T.Tanabaev
Memleket basshysy Qasym-Jomart Toqaevtyń bastamasymen elimizde buqaralyq sportty damytýǵa erekshe kóńil bólinip otyr. Osy dúbirli doda – sol bastamanyń jarqyn kórinisi.
Týrnırdi Parlament Májilisiniń depýtaty Elnur Beısenbaev ashyp, jarysqa qatysýshylardy Respýblıka kúnimen quttyqtady.
«Dástúrli jarysymyz osymen úshinshi ret ótip jatyr. Jýrnalısterimiz fýtboldy jaqsy kóretinin jaqsy bilemiz. Sondyqtan jyl saıyn osy dodaǵa degen qyzyǵýshylyq joǵary. Biz árdaıym buqaralyq sportqa erekshe mán beremiz. Osy baǵytta ózderińizben birlesip, jumys isteýge daıynbyz. Búgingi týrnır tartysty ótedi dep oılaımyn. Barshańyzǵa sáttilik serik bolsyn», dedi depýtat E.Beısenbaev.
Jarysqa Shyǵys Qazaqstan, Jetisý, Túrkistan, Qyzylorda, Almaty oblystarynan, Shymkent pen Almaty qalalarynan, sondaı-aq Astanadan 20-ǵa jýyq komanda qatysyp jatyr.
Májilis depýtattary men qyzmetkerleri de buqaralyq sportty qoldap, jýrnalıstermen birge dop tepti.
Týrnır Qazaqstan fýtbol federasııasynyń, elorda ákimdiginiń qoldaýymen ótip jatyr.
