Jarysty ádettegideı grek-rım kúresi sheberleri bastady. Tıranaǵa jol tartqan «klassıkter» arasynan Dinmuhammed Qoshqarǵa aıryqsha senim artylǵan edi. 67 kg salmaqta synǵa túsken Jambyl oblysynyń ókili 2022 jyly 20 jastaǵy balýandar arasynda álem chempıonatynyń qola júldegeri atanyp, Azııa birinshiliginde bas júldeni oljalady. Odan buryn kadetter jarysynda qarsylas shaq keltirmedi. Bıyl mamyr aıynda Qoshqar Ystanbulda ótken lısenzııalyq týrnırde baq synap, sheshýshi tusta súrindi. Sóıtip, oǵan Parıj Olımpıadasynda baq synaý baqyty buıyrmady. Biraq bul joly Dinmuhammed bilgeninen jańyldy. Dúbirli dodanyń ekinshi kezeńinde qandasymyz reseılik Danıal Agaevtan (5:7) aılasyn asyra almady.
Ár jyldary jastar arasyndaǵy Azııa birinshilikterinde jeńis tuǵyryna kóterilgen Erbol Qamalıev (55 kg), Dosjan О́tepqalıev (60 kg), Nursultan Bazarbaev (63 kg), Mereı Máýlithanovtyń (72 kg) keminde bireýi atoı salatyn shyǵar dep úmittendik. Alaıda olar da qalyń toptyń arasynda qalyp qoıdy. Erbol úndilik Vısjavjıt Moreden (0:9), Dosjan grýzııalyq Prıdon Abýladzeden (4:7), Nursultan armenııalyq Arman Vardanııannan (0:10), Mereı qyrǵyz Ábilhan Nurlanbekovten (2:5) jeńildi.
«Klassıkterdiń» komandalyq esebinde Iran quramasy (3 altyn+0 kúmis+4 qola) kósh bastady. Parsy eliniń ókilderi jeti júldege qol jetkizdi. Onyń úsheýi – altyn. Moldova (2+0+0) eki altyn alyp, ekinshi oryndy oljalady. Odan keıingi satylarǵa Reseı (1+2+3), Grýzııa (1+1+4), Armenııa (1+1+0), Qyrǵyzstan (1+0+1), О́zbekstan (1+0+0), Ázerbaıjan (0+1+2), Germanııa (0+1+1), Nıderland (0+1+0), AQSh (0+1+0), Belarýs (0+1+0), Polsha (0+0+2), Japonııa (0+0+1), Úndistan (0+0+1), Majarstan (0+0+1) jaıǵasty.
Grek-rım kúresinen álem chempıony atanǵan balýandar: 55 kg – Álı Ahmadı Vafa (Iran), 60 kg – Álisher Ǵanıev (О́zbekstan), 63 kg – Vıtalıı Eremenko (Moldova), 67 kg – Razaq Beıshekeev (Qyrǵyzstan), 72 kg – Georgıı Chhıkvadze (Grýzııa), 77 kg – Aleksandr Gýtý (Moldova), 82 kg – Muhammed Ázız Nahaýzı (Iran), 87 kg – Áýez Ganıbov (Reseı), 97 kg – Aık Hloıan (Armenııa), 130 kg – Fardın Shaban Hebıatı (Iran).
Kelesi kúnderi áıelder kúresinen ótken básekelerdi tamashaladyq. Balqan túbeginde Laýra Ǵanıqyzy (50 kg), Zeınep Baıanova (53 kg), Aınur Áshimova (55 kg), Shuǵyla О́mirbek (57 kg), Gúldana Bekesh (59 kg), Tynys Dúbek (62 kg), Gúldana О́serbaı (65 kg), Beıbit Seıdýaly (68 kg), Anastasııa Panasovıch (72 kg), Alına Ertóstik (76 kg) syndy burymdylar baq synady. Biraq qyzdardan da qaıyr bolmady. Osy 10 sportshynyń arasynan Laýra, Zeınep, Alınanyń ǵana jeńis tuǵyryna kóterilýge jaqsy múmkindigi boldy. Alaıda qola medal úshin básekede olar óz qarsylastaryna jol berdi.
Burymdylar básekesinde AQSh-tyń arýlary (3+1+1) aldaryna jan salmady. Jalpy esepte solar kósh bastady. Japonııa (2+1+3) men Ýkraınanyń (2+0+4) da qarqyny kúshti boldy. Odan keıingi oryndardy Shvesııa (1+0+0), Ázerbaıjan (1+0+0), Moldova (1+0+0), Reseı (0+2+1), Kanada (0+2+0), Úndistan (0+1+3), Qytaı (0+1+1), Meksıka (0+1+0), Túrkııa (0+1+0), Belarýs (0+0+2), Germanııa (0+0+1), Mońǵolııa (0+0+1), Nıgerııa (0+0+1), Polsha (0+0+1), Rýmynııa (0+0+1) enshiledi.
Áıelder kúresinen álem chempıony atanǵan balýandar: 50 kg – Seıdj Reın Moıtımer (AQSh), 53 kg – Iý Sakamoto (Japonııa), 55 kg – Emma Malmgren (AQSh), 57 kg – Jala Álıeva (Ázerbaıjan), 59 kg – Solomııa Vınnık (Ýkraına), 62 kg – Irına Bondar (Ýkraına), 65 kg – Irına Rıngachı (Moldova), 68 kg – Amı Isı (Japonııa), 72 kg – Kaılı Renı Velker (AQSh), 76 kg – Elena Makoed (AQSh).
Erkin kúresten de 10 saıypqyranǵa senim artyldy. Solardyń arasynan Rızabek Aıtmuhan sýyrylyp shyqty. 97 kg salmaqta kúsh synasqan qazaq balýany alǵashqy aınalymda Kanadadan kelgen Kallým Ýılıam Nokstyń (11:0) tas-talqanyn shyǵardy. Kelesi kezeńde belarýstik Vladıslav Kozlovty (10:0) bet qaratpaı utty. Bul básekelerdiń ekeýi de merziminen buryn aıaqtaldy. Jartylaı fınalda qandasymyz dańqty Daǵystan erkin kúres mektebiniń túlegi Shámil Gadjıálıevti (7:4) jolynan yǵystyrdy. Fınalda Aıtmuhan jastar arasyndaǵy álem birinshiliginiń kúmis júldegeri, ırandyq Mahdı Morafamen (11:6) aıqasty. Parsy eli ókili de jerlesimizge jarytyp qarsylyq kórsete almady. Sóıtip, Rızabek álem chempıony atandy.
Ákesi Qanat Joldasbaevtyń qol astynda jattyǵatyn Aıtmuhannyń esimi qazirdiń ózinde elimizdiń sport tarıhynda altyn áriptermen jazýly tur. Byltyr ol Belgradta eresekter arasynda ótken álem chempıonatynda bas júldeni oljalady. Rızabekke deıin osy sport túrin serik etken birde-bir otandasymyz dál osyndaı dárejege jetken joq edi. Bıyl Ispanııanyń Pontevedro qalasynda jalaýy jelbirgen jastardyń dúnıejúzilik birinshiliginde (U-20) qandasymyz qarsylas shaq keltirmeı, jeńis tuǵyrynyń eń bıik satysyna kóterildi. Mine, endi ol Tıranada top jardy. Eger sporttyq shejireni paraqtasaq, 23 jasqa deıingilerdiń álem chempıonatynda (U-20) qazaqtyń jigitteri alty ret fınalda beldesti. Biraq sheshýshi tusta barlyǵy da jeńilistiń kermek dámin tatty. Al Balqan túbeginde bul beles Rızabek Aıtmuhanǵa baǵyndy.
57 kg salmaqtaǵy Alan Oralbek bastapqy básekelerde grýzııalyq Lýka Gvınjııa (8:5) men mońǵolııalyq Jagýr Sarantýıaǵa (+3:3) san soqtyrdy. Jartylaı fınalda jerlesimizdiń joly bolmady. Ol úndistandyq Chırag Chıragtan (0:8) ońbaı jeńildi. Al qola medal úshin tartysta Alan reseılik Iýnýs Iаvbatyrovqa (2:6) jol berdi.
Albanııa astanasyndaǵy aıqasqan ózge erkin kúres sheberlerimizdiń óneri kóńilden shyqpady. Alǵashqy kúni Ádilet Álmuhamedov (61 kg) ırandyq Ibragım Mehdı Harıden (1:12), Murat Jaqypov (74 kg) amerıkalyq Mıtchell Mesenbrınkten (2:7), Nurjan Isaǵalıev (86 kg) ızraıldik Aaron Aıýzerovtan (5:10), Bekzat Amanǵalıev (92 kg) majarstandyq Musa Arsýnkaevtan (0:6), Omarhan Nádirov (125 kg) bolgarııalyq Alen Hýbýlovtan (2:6) oısyraı utyldy. Kelesi táýlikte Bekzat Ermekbaı (65 kg) fransııalyq Hamzat Arsamerzoevtyń (0:11), Ernur Nurǵazy (70 kg) Parsy eliniń pehlevany Álı Mahmud Horramdeliniń (3:10), Jeńis Qanybekov (79 kg) reseılik Arsen Balaıannyń (1:6) osal tusyn taba almady.
Jalpy esepte Iran (3+1+4) men Reseı (3+1+3) ózgelerden qara úzip ketti. Ázerbaıjan (1+2+1), Japonııa (1+1+3), Úndistan (1+0+3), Qazaqstannyń (1+0+0) Ánurany Tıranada bir márte shyrqaldy. Sondaı-aq, Qyrǵyzstan (0+2+1), AQSh (0+1+1), Qytaı (0+1+0), Bolgarııa (0+1+0), Moldova (0+0+2), Ýkraına (0+0+1), Belarýstiń (0+0+1) balýandary júldeli oryndardy ıelendi.
Erkin kúresten álem chempıony atanǵan balýandar: 57 kg – Chırag Chırag (Úndistan), 61 kg – Bashır Magomedov (Reseı), 65 kg – Ibragım Ibragımov (Reseı), 70 kg – Magomed Bashır Hanıev (Ázerbaıjan), 74 kg – Kota Takahashı (Japonııa), 79 kg – Mahdı Mohammad Iýsefıhajıvar (Iran), 86 kg –Arslan Bagaev (Reseı), 92 kg Amırhosseın Fırýzpýr Bandpeı (Iran), 97 kg – Rızabek Aıtmuhan (Qazaqstan), 125 kg – Amırreza Valadı (Iran).
Osylaısha, Rızabek Aıtmuhannan basqa balýandarymyz tegis utyldy. Memleket mol qarajat quıyp, jastardyń esh alańsyz daıarlanýyna barlyq jaǵdaı jasady. Jarysqa jigitter men qyzdardy tolyq quramda apardy. Al nátıje kóńil kónshiterlik emes. Alpaýyttardy aıtpaǵanda, Qyrǵyzstan 1 altyn, 2 kúmis, 2 qolany qorjynǵa saldy. Alaqandaı ǵana Moldova Tıranadan úsh altyn men eki qolany oljalap qaıtty. Basqa da elimizden áleýeti áldeqaıda tómen eldiń órenderi táýir nátıjege qol jetkizdi. Al bizge buıyrǵany – jalǵyz ǵana bas júlde.
