Árbir nota týǵan jerdiń jylýyn syılaıdy. «My Motherland» mýzykalyq týyndysyn tanymal oryndaýshy Sangina Qazaqstanǵa arnady. Án týǵan jerge degen súıispenshilikke toly jáne elimizdiń baı mádenıetin qalyń kópshilikke kórsetýge baǵyttalǵan.
«My Motherland» ániniń ıdeıasy AQSh-qa bir jarym jyl buryn kóshken kezde paıda boldy. Qazaqstannan alysta júrgende men erekshe saǵynyshty sezindim jáne týǵan jerimmen baılanysym qanshalyqty myqty ekenin túsindim. Biz arman qýyp, basqa elge kóship, aınalamyzdy ózgerte alamyz, jańa tilderdi úırenemiz. Biraq qaı jerde bolsaq ta, bizben árdaıym birge bolatyn nárseler bar – bul bizdiń tamyrymyz, mádenıetimiz, Otanymyz. Án bastapqyda qazaq tilinde jazylǵan. Alaıda Batys mýzyka ındýstrııasynda belsendi eńbek etip, men bul ándi aǵylshyn tildi aýdıtorııaǵa jetkizý mańyzdy ekenin túsindim», dep atap ótti ánshi.
«My Motherland» barlyq negizgi strımdik platformalarda qoljetimdi. Kompozısııada Sangina qazaqtyń ulttyq yrǵaǵyn zamanaýı pop-mýzykamen jáne blıýzben úılestiredi. Oryndaýshy qazir óz jumysyn osy baǵytta jalǵastyrýda jáne ulttyq mádenıetti nasıhattaýǵa nıetti.
«Meniń oıymsha, mádenı ártúrlilik jeke mýzykama erekshe sıpat beredi jáne keń aýdıtorııanyń júregine jetýge múmkindik týdyrady. Men ártúrli mádenıettegi adamdarǵa jaqyn án jazýǵa jáne mýzyka shynymen biriktire alatynyn kórsetýge tyrysamyn», deıdi Sangina.
Ánshi Taraz qalasynda dúnıege kelgen. Názik jan týǵan jerdiń ár óńirin aralap, týrıstik oryndarǵa jıi barady. Jas oryndaýshynyń pikirinshe, Qazaqstannyń baı mádenıeti, kórkem tabıǵaty jáne biregeı tarıhı murasy bar.
«Qazaqstan – biregeı tabıǵı ǵajaıyptar toǵysqan tańǵajaıyp el. Onyń ishinde Qaıyńdy kóli, Kólsaı kólderi, Sharyn shatqaly jáne Kaspıı teńiziniń jaǵalaýy aınalasynda Beket ata sııaqty jerasty meshitteri bar. Elimizdiń ońtústik bóligi tarıh pen rýhanı oryndarǵa baı. Eldiń ár buryshy óziniń tarıhy men erekshe sulýlyǵyn saqtaǵan. Men árdaıym ózim úshin jańa nárseni qýana ashamyn. Birneshe jylda bir ret mindetti túrde qasıetti jerlerge ekskýrsııa jasaımyn. Bul saparlar maǵan árqashan tazalyq, tynyshtyq jáne jańa jobalarǵa shabyt beredi», dep ol sózin túıindedi.
Qarasha aıynda Sangina qazaqstandyq oryndaýshy Danna Max-pen birlese sheteldik aýdıtorııaǵa jańa sıngl tanystyrýdy josparlap otyr.
