Gazı ýnıversıteti – 1926 jyly negizi qalanǵan joǵary oqý orny. Túrkııada ǵylym men bilim berýdiń irgeli ortalyǵy retinde qurylǵan alǵashqy oqý oryndarynyń biri. Munda gýmanıtarlyq, jaratylystaný ǵylymdary, medısına jáne taǵy basqa baǵyttar boıynsha bilikti mamandar daıarlanady. Al О́zbekáli Jánibekov atyndaǵy Ońtústik Qazaqstan pedagogıkalyq ýnıversıteti 1937 jyly elimizdiń ońtústik óńirinde boı kótergen joǵary bilim men ǵylymnyń qara shańyraǵy. Búginde ýnıversıtet bilim salasynyń úzdik mamandaryn oqytady.
Eki ýnıversıtet arasyndaǵy ózara yntymaqtastyq 2021 jyly 13 qazanda bastaý alǵan. Gazı ýnıversıtetiniń rektory, professor Musa Iyldyzdyń О́zbekáli Jánibekov atyndaǵy Ońtústik Qazaqstan pedagogıkalyq ýnıversıtetine resmı sapary barysynda ózara yntymaqtastyq týraly, «Erasmus» baǵdarlamasy boıynsha ózara seriktestik týraly ınstıtýtaralyq kelisimshartqa qol qoıǵan. Sonyń nátıjesinde joǵary bilim men ǵylym salasyndaǵy birqatar bastamaǵa jol ashyldy. Bıyl О́.Jánibekov ýnıversıtetiniń 10 stýdenti akademııalyq utqyrlyq baǵdarlamasy aıasynda bilim alýǵa Gazı ýnıversıtetine jiberilip, bir semestr boıy bilim alyp, tájirıbe almasyp keldi. Sondaı-aq 2 doktorant Gazı ýnıversıtetinde bilikti ǵalymdardyń jetekshiligimen ǵylymı taǵylymdamadan ótti.
Byltyr mamyr aıynda О́.Jánibekov ýnıversıteti rektory Gazı ýnıversıtetine resmı saparmen bardy. Sonyń barysynda ádistemelik, ǵylymı qyzmet, magıstratýra, doktorantýra sekildi bilim berý baǵdarlamalary aıasynda yntymaqtastyq týraly qosymsha kelisimge qol qoıyldy. Bıyl О́.Jánibekov ýnıversıtetiniń taǵy 10 stýdenti akademııalyq utqyrlyq baǵdarlamasy aıasynda Gazı ýnıversıtetinde bilim alsa, 6 doktorant ǵylymı taǵylymdamadan ótip qaıtty. Sonymen birge Gazı ýnıversıtetiniń professory Iýjel Gelıshlı elimizdiń Ǵylym jáne joǵary bilim mınıstrliginiń «Sheteldik ǵalymdardy oqytýshylyq qyzmetke tartý» baǵdarlamasy aıasynda О́.Jánibekov ýnıversıtetinde bilim alýshylarǵa dáris oqyp, bir aı boıy professor-oqytýshylarmen tájirıbe almasty.
ShYMKENT
