Foto: Ǵylym jáne joǵary bilim mınıstrligi baspasóz qyzmeti
Is-sharanyń ashylý saltanatyna Qazaqstan Respýblıkasy Ǵylym jáne joǵary bilim mınıstrligi men Oqý-aǵartý mınıstrliginiń basshylyǵy, «Educational Testing Service» ETS (AQSh), «AQA» (Ulybrıtanııa), National Foundation For Educational Research (NFER) (Ulybrıtanııa), Dutchtestologis (Nıderlandy), «TÖMER» ortalyǵy (Túrkııa), Vantage Labs kompanııasy (AQSh) syndy testologııa salasyndaǵy álemniń jetekshi kompanııalarynyń basshylary men ókilderi, Eýrazııa bilim berý sapasyn baǵalaý qaýymdastyǵynyń ókilderi, Reseı, О́zbekstan, Qyrǵyzstan, Ázerbaıjan, Tájikstan, Armenııa elderiniń emtıhan ortalyqtarynyń ókilderi, sondaı-aq baǵalaý tehnologııalary men pedagogıkalyq ólshemder salasyndaǵy otandyq ǵalymdar men mamandar qatysty.
Ǵylym jáne joǵary bilim mınıstri Saıasat Nurbek konferensııanyń mańyzdylyǵyn eskere otyryp, bul shyǵarmashylyq ıdeıalardy talqylaýǵa, bolashaqty boljaýǵa, sondaı-aq ozyq bilim men tájirıbe almasýǵa baǵyttalǵan biregeı joba ekenin atap ótti.
«UBT – bilim berý prosesiniń mańyzdy bóligi. Búgingi tańda bizdiń mindetimiz – qol jetkizgen nátıjelerdi saqtap qana qoımaı, alǵa qaraı umtylý. Biz tehnıkanyń qarqyndy damýyn tolyqtyrý men bilimdi baǵalaýdyń jańa tásilderi dáýirinde ómir súrip jatyrmyz, ıaǵnı ýaqyt talabyna saı, syn-tegeýringe daıyn bolý mańyzdy», dedi mınıstr.
Ulttyq testileý ortalyǵynyń dırektory Bolatbek Abdrasılov UBT-nyń 20 jyldyq tarıhyndaǵy ataýly jetistikteri men mańyzdy jobalaryn tanystyrdy.
«2004 jyly engizilgen testileý mektep bitirýshileriniń bilimin baǵalaýǵa degen kózqarastaryn túbegeıli ózgertip, eldegi joǵary oqý oryndaryna túsýdiń negizgi tetigine aınaldy. UBT Qazaqstan bilim berý júıesiniń bilimdi baǵalaý jáne stýdentterdi irikteýdegi eleýli ózgerister men reformalardy beıneleıtin negizgi bólshegi bolyp tabylady. Eki onjyldyq ishinde UBT zamanaýı tehnologııalar men ǵylymı tásilderge negizdelgen kúrdeli jáne kópqyrly júıege ári Qazaqstandaǵy bilim berý júıesiniń ajyramas bóligine aınaldy», dedi Bolatbek Serikbaıuly.
Is-sharada ortalyq qalyptasqan sátten beri basqarǵan basshylar marapattaldy. Sondaı-aq AQSh, Reseı, Túrkııa, О́zbekstan, Qyrǵyzstan elderiniń emtıhan ortalyqtarymen bilim deńgeıin baǵalaý jáne damytý aıasynda ózara yntymaqtastyqty qoldaý men damytýǵa baǵyttalǵan memorandýmdarǵa qol qoıyldy.
Kezdesýde halyqaralyq sarapshylar bilim berýdiń nátıjelerin baǵalaý, bilim sapasyn arttyrý, jasandy ıntellekt pen jańa tehnologııalar sııaqty mańyzdy taqyryptar aıasynda álemdik tájirıbe jáne jetistiktermen bólisti.
Konferensııanyń seksııalyq otyrystarynda jetekshi otandyq jáne sheteldik praktık-ǵalymdar óz keısterin usynyp, is-sharaǵa qatysýshylarmen biregeı tájirıbelerimen almasty.
Konferensııanyń jumysy mańyzdy dóńgelek ústelge jalǵasyp, bilim berý sapasyn baǵalaý salasyndaǵy zamanaýı syn-qaterler, múmkindikter, sonymen qatar testologııa salasyndaǵy mamandardy daıarlaýdyń qazirgi mindetteri men bolashaǵy talqylandy.
