Prezıdent quttyqtaýynda otandastarymyz jazýshyny óziniń biregeı qoltańbasymen qalyń oqyrmannyń júreginen oryn alǵan qarymdy qalamger, daryndy dramatýrg retinde qurmetteıtini atap ótilgen.
«Siz kóp jyl boıy ulttyq ádebıetimiz ben mádenıetimizdi órkendetýge súbeli úles qosyp kelesiz. Qalamyńyzdan shyqqan tartymdy týyndylarǵa zamannyń úni, qoǵamnyń tynysy jáne adamdardyń jan dúnıesi men asyl qasıetteri arqaý boldy. Sizdiń qoltańbańyzda qaısar minezdi abzal ana, qaıratker áıel beınesin jasaýdaǵy sýretkerlik sheberligińiz anyq baıqalady. «Máńgilik bala beıne», «Farıza», «Bopaı hanym» jáne basqa dramalyq shyǵarmalaryńyz teatr sahnasynda qoıylyp, kórermen tarapynan joǵary baǵasyn aldy. Aldaǵy ýaqytta oqyrmandardy jańa týyndylaryńyzben qýanta berýińiz úshin Sizge shyǵarmashylyq shabyt tileımin», delingen Memleket basshysynyń quttyqtaýynda.
M.Áshimbaev óz sózinde R.Muqanovanyń shyǵarmashylyǵy qazaq ádebıetiniń qazynasyna aınalǵan naǵyz klassıka ekenin atap ótti. Qalamgerdiń týyndylary men kóptegen pesasy oqyrman qaýymnyń joǵary baǵasyn alyp, shetelderde de moıyndalǵany belgili. Oǵan jazýshy shyǵarmalarynyń halyqaralyq festıvalderde alǵan júldeleri aıqyn dálel.
«Roza Muqanovanyń týyndylarynda áıel taǵdyry aıryqsha oryn alady. Sondaı-aq qalamger rýhanı máselelerge nazar aýdaryp, adamgershilik, izgilik, meıirimdilik sııaqty durys qundylyqtardy dáripteýge basymdyq beredi. Shyǵarmalarynyń basym bóligi shetelderde de keńinen tanymal. Olardyń kóbi teatr sahnalarynda qoıylyp júr. Osylaısha, Roza Qajyǵalymqyzy óz týyndylary arqyly qazaq dramatýrgııasy men mádenıetin damytýǵa úlken úles qosty», degen M.Áshimbaev jazýshyǵa zor densaýlyq, baq-bereke jáne sarqylmas shabyt tiledi.
Sonymen qatar is-shara barysynda zııaly qaýym ókilderi, qalamgerler jáne qoǵam qaıratkerleri sóz sóılep, mereıtoı ıesiniń shyǵarmashylyq ómiri týraly aıtty jáne jyly lebizin bildirdi.
