Jańa býyn mamandaryn daıarlaýǵa arnalǵan zerthana stýdentterge bank jáne qarjy salasynda teorııalyq bilim men tájirıbe alýǵa múmkindik beretin kásibı alańǵa aınalmaq ári olar jańa tehnologııalardyń jetistikterin ıgeretin bolady.
Saltanatty sharaǵa Halyq bankiniń resmı ókilderi, QazUÝ ǵalymdary men stýdentteri qatysty.
Ál-Farabı atyndaǵy QazUÝ birinshi prorektory Erkin Dúısenov áriptestik negizde ashylǵan zerthana múmkinshilikteri jaıynda aıtyp ótti.
«Bul óz kezeginde stýdent jastardyń ýnıversıtet qabyrǵasynda alyp jatqan teorııalyq bilimderin praktıkamen ushtastyrýǵa berilgen biregeı múmkindik. Zerthanada stýdent jastar qarjy salasynda bilim men ártúrli daǵdylardy meńgerip, bolashaqta tabysty jumys isteı alady. Sondyqtan Halyq bankimen áriptestigimiz ary qaraı nyǵaıa beredi», dedi prorektor.
О́z kezeginde «Qazaqstan Halyq Banki» AQ basqarma tóraǵasynyń orynbasary Dáýren Sartaev:
«Qazaqstannyń jetekshi joǵary oqý oryndarynyń biri – Ál-Farabı atyndaǵy QazUÝ-da stýdentterge arnalǵan zerthanamyzdyń ashylýy biz úshin úlken mártebe. Búginde aqparattyq tehnologııalar fakýltetiniń túlekteri ártúrli salada qyzmet etip, óz biliktilikterin kórsetip jatyr. Oǵan dálel – bizdiń Halyq banktiń HR dırektory Indıra Ashırova osy fakýltettiń túlegi, óz salasynyń kásibı mamany. Sondyqtan da fakýltet matematıka, qarjy, IT salasynyń myqty irgetasy qalanǵan úlken mektep bolyp qala beredi», dep atap ótti.
Búginde «Qazaqstan Halyq Banki» AQ Ál-Farabı atyndaǵy QazUÝ-dyń negizgi seriktesi ǵana emes, sonymen qatar bakalavrıat, magıstratýra jáne doktorantýra deńgeılerinde «Derekter týraly ǵylym/Data Science» bilim berý baǵdarlamasynyń birlesken qurastyrýshysy jáne jumys berýshi bolyp tabylady. Bul ádis oqý baǵdarlamasy men kásibı standarttardyń úılesimdiligin qamtamasyz etip, túlekterge mansaptyq qadamdarǵa jol ashyp, derekter bazasymen jumys isteýge múmkindik beredi.
«Halyk Academy» baǵdarlamasy aıasynda stýdentterge bank sarapshylarynyń dáristeri, ashyq esik kúnderi, sondaı-aq ındýstrııanyń zamanaýı talaptaryn eskere otyryp ázirlengen bank mamandyqtary boıynsha kýrstar ótetin bolady. Sonymen qatar akademııa aıasynda ǵylymı zertteýler men tehnologııalyq ázirlemelerdi (R&D) damytý josparlanyp jatyr. Bul stýdentter men oqytýshylarǵa qarjy salasyndaǵy ınnovasııalardyń damýyna yqpal etetin ózekti jobalarmen jumys isteýge múmkindik beredi.
ALMATY
