Saltanatty is-sharaǵa M.O.Áýezov atyndaǵy Ádebıet jáne óner ınstıtýtynyń bas dırektory, QR UǴA akademıgi, fılologııa ǵylymdarynyń doktory Kenjehan Islámjanuly Matyjanov, «Qazaq ádebıeti» gazetiniń Bas redaktory, UǴA akademıgi, fılologııa ǵylymdarynyń doktory Baýyrjan Jaqyp, ál-Farabı atyndaǵy Qazaq ulttyq ýnıversıteti janyndaǵy Abaı ǵylymı-zertteý ınstıtýtynyń professory, fılologııa ǵylymdarynyń doktory Qanseıit Ábdezuly, M.O.Áýezov atyndaǵy Ádebıet jáne óner ınstıtýtynyń bas ǵylymı qyzmetkeri, fılologııa ǵylymdarynyń doktory Nurdáýlet Aqysh, Almaty qalasy ákiminiń keńesshisi Mamaı Ahetov, Almaty qalasy Mádenıet basqarmasy basshysynyń orynbasary Arman Halbekov, M.O.Áýezov atyndaǵy Ádebıet jáne óner ınstıtýtynyń Syrtqy ádebı baılanystar jáne analıtıka bóliminiń meńgerýshisi, fılologııa ǵylymdarynyń kandıdaty Svetlana Ananeva, ınstıtýttyń bas ǵylymı qyzmetkeri, fılologııa ǵylymdarynyń doktory Gúljahan Orda, fızıka-matematıka ǵylymdarynyń doktory Dastan Sherıazdanuly Eleýkenov qatysyp, quttyqtaý sóz sóıledi. 
Saltanatty is-sharany memlekettik qyzmet salasynyń úzdigi Nurmuha Shaımerdenov júrgizdi.
Is-sharaǵa M.O.Áýezov atyndaǵy Ádebıet jáne óner ınstıtýtynyń ujymy, Abaı atyndaǵy QazUP ýnıversıtetiniń jáne Ál-Farabı atyndaǵy QazUÝ-niń oqytýshylary jáne stýdentteri qatysty.
Sherıazdan Rústemuly Eleýkenov – ádebıettanýshy-ǵalym, synshy, jazýshy. 1929 jyldyń 3 qyrkúıeginde Shyǵys Qazaqstan oblysy, Ulan aýdany, Arshaly aýylynda dúnıege kelgen.
1951 jyly Qazaqtyń S.M.Kırov atyndaǵy Memlekettik ýnıversıtetiniń fılologııa fakýltetin bitirgennen keıin ShQO «Kommýnızm týy» gazetinde ádebı qyzmetker, bólim meńgerýshisi (1951-59), QazMÝ-da aǵa oqytýshy (1959-63), Qazaqstan Kompartııasy Ortalyq Komıtetiniń apparatynda nusqaýshy, sektor meńgerýshisi, bólim meńgerýshisiniń orynbasary (1967-71), Qazaqstan Baspa, polıgrafııa jáne kitap saýdasy isteri jónindegi memlekettik komıtetiniń tóraǵasy (1971-86), Qazaqstan Ǵylym Akademııasynyń M.O.Áýezov atyndaǵy Ádebıet jáne óner ınstıtýtynyń dırektory (1986-1988) qyzmetterin atqardy.
Sh.R.Eleýkenov tarıhtaǵy «aqtańdaqtardy» joıý, ulttyq ádebı murany túgendeý, buryn ultshyl atanǵan, stalındik qýǵyn-súrginge ushyraǵan aqyn, jazýshylardyń shyǵarmalaryn qaıta qarap jarııalaý jónindegi Ortalyq Komıtet qurǵan komıssııa tóraǵasynyń orynbasary retinde Shákárim Qudaıberdıev, Maǵjan Jumabaev, Ahmet Baıtursynov, Mirjaqyp Dýlatov, Júsipbek Aımaýytov sekildi saıası qýǵyn-súrgin qurbany bolyp, zańsyz aıyp taǵylǵan asa kórnekti aqyn-jazýshylardyń asyl murasyn halqyna qaıtarý isinde úlken is atqardy.
ALMATY
