Foto: disk.yandex.ru
Qaraǵandy oblysy kómir, temir-marganes pen polımetall kenderiniń jáne basqa da paıdaly qazbalardyń mol qory shoǵyrlanǵan mıneraldyq-shıkizattyń iri óńiri bolyp sanalady. Oblysta 604 jer qoınaýyn paıdalanýshy jumys istep keledi. Onyń ishinde «Qazaqmys» jáne Qarmet bar. Taý-ken óndirý men óńdeý salalarynda 113 myń adam nemese oblysta jumys isteıtin halyqtyń 20% astamy jumyldyrylǵan. Osy jyldyń 10 aıynda óńir kásiporyndarynan túsetin salyq túsimderi 507 mlrd teńgeden artty.
Qarjy mınıstri Mádı Takıev pen Qaraǵandy oblysynyń ákimi Ermaǵanbet Bólekpaev úsh óńirdiń (Qaraǵandy, Pavlodar, Aqmola oblystary) kásipkerlerine jańa Salyq kodeksi salyq qyzmetindegi ákimshilendirýdi jeńildetý esebinen bızneske qoldaý kórsetýge baǵyttalǵanyn aıtty.
Atap aıtqanda, jańa Salyq kodeksinde mańyzdy fıskaldy kirisi joq tólemderdi alyp tastaý qarastyrylǵan.
«Memleket basshysy Qazaqstan halqyna Joldaýynda Úkimetke bıznesti júrgizýge jaǵdaıdy jaqsartýdy tapsyrǵan bolatyn. Jańa Salyq kodeksinde biryńǵaı jer salyǵyn jeke tabys salyǵyna aýystyrý usynylyp otyr. Aıtalyq, 3 tólemdi biriktirý usynylǵan: sý resýrstary men ormandy paıdalaný, sondaı-aq janýarlar álemin paıdalaný úshin. Tutastaı alǵanda, tólem mólsherlemeleriniń kólemi 77-ge qysqarady. Alymdardyń 6 túrin qysqartý usynylyp otyr. Olar boıynsha mólsherlemelerdiń 34 túri alynyp tastalady. Sondaı-aq memlekettik bajdardyń 5 túri alynyp tastalady, olar boıynsha mólsherlemeler 51-ge qysqartylady», dedi Mádı Tókeshuly.
Salyq tóleýshilerdiń barlyq sanaty úshin sýbektıvtilik mólsherine qaramastan ınvestısııalarǵa «balama» yntalandyrýlar beriletin bolady.
Ǵımarattardy, qurylystardy, mashınalardy, jabdyqtardy, baǵdarlamalyq qamtamasyz etýdi satyp alý/salý shyǵyndaryn onyń fýnksıonaldy maqsatyna baılanystyrmaı birjolǵy 100% shegerý túrinde ınvestısııalyq salyq preferensııalary usynylady. Sonymen qatar jeke óndiris ónimderin óndirý jáne satý úshin tabys salyǵynyń tómendetilgen mólsherlemesi belgilenedi.
QR UEM Salyq jáne keden saıasaty departamentiniń dırektory Erlan Saǵynaev jańa Salyq kodeksiniń jobasy sarqylyp jatqan ken oryndarynda óndiristi saqtap qalýǵa múmkindik beretin sharalardy qarastyratynyn aıtty.
«Tehnogendi mıneraldy túzilimderdiń quramynan paıdaly qazbalardy óndirý úshin PQО́S tómendetilgen mólsherlemelerin belgileý usynylady. Biz bul sharalar qarjy kórsetkishterin jaqsartý jáne óndirý kólemin ulǵaıtý esebinen bıýdjetke qosymsha túsimderdi qamtamasyz etetinine senimdimiz», dedi QR UEM Salyq jáne keden saıasaty departamentiniń dırektory.
Kezdesýge qatysýshylar ashyq dıalog pen tyǵyz baılanys taý-ken salasynyń odan ári ornyqty ósimi men bıýdjetke turaqty túsimderdi jáne jalpy el ekonomıkasyn nyǵaıtýdy qamtamasyz etetin tıimdi sheshimderdi tabýǵa múmkindik beretinine senim bildirdi.
Bıznes ókilderimen kezdesýden keıin Qarjy mınıstri elimizdiń eń iri bolat jáne taý-ken kompanııasy Qarmet sehtaryna aıaldady.
