Otyrysty ashqan Máýlen Áshimbaev Lázzat Qaltaevany Senat tóraǵasynyń keńesshisi bolyp taǵaıyndalýymen quttyqtady. Sondaı-aq ol Lázzat Qaltaeva palata janyndaǵy Inklıýzııa jónindegi keńestiń tóraǵasy bolyp qala beretinin atap ótti. Senat tóraǵasy áriptesine senator retinde zań shyǵarý salasynda atqarǵan eseli eńbegi úshin Memleket basshysynyń Alǵyshatyn saltanatty túrde tapsyrdy.
Is-shara barysynda palata spıkeri barshaǵa teń múmkindik jasalǵan ınklıýzıvti qoǵam qalyptastyrý Prezıdent qolǵa alǵan reformalardyń mańyzdy basymdyqtarynyń biri ekenin aıtty. Keıingi jyldary osy baǵytta júıeli jumys júrgizilip keledi. Sonyń nátıjesinde kóptegen salada oń úrdis baıqalyp otyr.
Sondaı-aq M.Áshimbaev qazirgi tańda Qazaqstanda 725 myńǵa jýyq múgedektigi bar adam turatynyna, onyń 232 myńy erekshe bilim berýdi qajet etetinine nazar aýdardy. Senat tóraǵasy olardyń bári laıyqty bilim alýǵa quqyly ekenin tilge tıek etip, atalǵan máselede áli de bolsa túıini tarqatylmaǵan túıtkilder baryn eske saldy. Bul, eń aldymen, kásiptik jáne joǵary bilim alýǵa qatysty bolyp otyr.
«О́kinishke qaraı, keıingi jyldary erekshe bilim berý qajettiligi bar balalar sany artyp otyr. Sondyqtan barlyq balaǵa sapaly bilim alýdyń qoljetimdiligin qamtamasyz etýdi jetildirý kerek. Erekshe qajettiligi bar adamdardy oqytý orta bilimmen shektelmeýge tıis. Olardyń laıyqty jumys taýyp, qoǵamnyń tolyqqandy múshesi bolýy úshin kásibı jáne joǵary bilim alýyna da jaǵdaı jasalýy qajet. Qazir joǵary oqý oryndarynda bilim alyp júrgen múmkindigi shekteýli azamattar sany az. Bul atalǵan sanattaǵy adamdardyń sapaly bilim alýyna kedergi keltiretin qıyndyqtar bar ekenin kórsetedi. Demek, olardyń ári qaraı jumysqa ornalasyp, qoǵamnan óz ornyn tabýyna teris áser etetin máseleler joq emes», dedi M.Áshimbaev.
Senat tóraǵasy sapaly bilim alýǵa jáne múgedektigi bar adamdardyń qabiletterin damytýǵa tusaý bolyp otyrǵan taǵy bir ózekti máselege toqtaldy. Bul – eńbek naryǵynyń osy sanattaǵy azamattardyń qajettilikterine beıimdelmeýi.
Elimizde 2012 jyldan beri memlekettik bilim granttaryn bólý kezinde 1 paıyzy múmkindigi shekteýli jandarǵa qarastyrylyp keledi. Alaıda palata spıkeriniń aıtýynsha, bul shara jetkiliksiz. Inklıýzıvti bilim berýge qatysty problemalardy sheshý keshendi tásildi qajet etedi. Sondyqtan bul rette zamanaýı bilim berý baǵdarlamalary, oqytýdyń tıimdi ádisteri, erekshe bilim berý qajettiligi bar balalarmen jumys isteı alatyn bilikti pedagogter daıarlaý sııaqty máselelerge basa mán bergen jón.
«Búginde elimizdegi árbir ekinshi pedagog erekshe qajettiligi bar balalarǵa arnalǵan jeke oqý josparlaryn ázirleýde qıyndyqtarǵa tap bolady. Bul – muǵalimderimizdiń aıtarlyqtaı bóligi ınklıýzıvti ortada jumys isteýge daıyn emes degen sóz. Jalpy, biz erekshe bilim berýdi qajet etetin balalardyń barlyq kezeńde, ıaǵnı balabaqsha, mektep, kolledj jáne joǵary oqý ornynda sapaly bilim alýy úshin tıisti jaǵdaı jasaýymyz kerek», dedi Senat tóraǵasy.
Keńes otyrysynda depýtattarmen birge Oqý-aǵartý mınıstri Ǵanı Beısembaev, Ǵylym jáne joǵary bilim vıse-mınıstri Talǵat Eshenqulov, Eńbek jáne halyqty áleýmettik qorǵaý vıse-mınıstri Asqarbek Ertaev, Densaýlyq saqtaý vıse-mınıstri Tımýr Sultanǵazıev, Áleýmettik ınnovatorlar qaýymdastyǵynyń prezıdenti Emın Askerov, «Shyraq» múgedektigi bar áıelder qaýymdastyǵynyń dırektory Tatıana Baklajanskaıa, «Qaırat Imanálıev atyndaǵy Múgedektigi bar adamdardyń quqyqtary jónindegi komıssııa» qoǵamdyq birlestiginiń tóraǵasy Gúlmıra Borasheva, «Teń múmkindikter álemi» qoǵamdyq qorynyń dırektory Nurgúl Úljekova jáne taǵy basqa qatysýshylar sóz sóılep, erekshe qajettiligi bar adamdardyń sapaly bilim alý múmkindikterin keńeıtýge qatysty tyń bastamalaryn usyndy.
Otyrys sońynda keńes barlyq usynysty jan-jaqty zerdelep, múddeli taraptardyń birlesip jumys isteýi úshin tıisti memlekettik organdarǵa joldaıtyny aıtyldy.
