KGIR jumysyn ashqan Oljas Bektenov dóńgelek ústel Memleket basshysynyń tóraǵalyǵymen ótken Sheteldik ınvestorlar keńesi otyrysynyń qısyndy jalǵasy sanalatynyn jáne bıznes-qoǵamdastyqpen tyǵyz dıalog qurýǵa baǵyttalǵanyn atap ótti.
El Úkimeti Memleket basshysynyń tapsyrmasyn oryndaý úshin qolaıly ınvestısııalyq ahýaldy qalyptastyrý jumysyn kúsheıtti. Qazir elimizde 14 arnaıy ekonomıkalyq aımaq jumys isteıdi. Onda ınvestorlar úshin salyqtyq jáne kedendik preferensııalar kózdelgen. Sheteldik jumys kúshin jaldaý rásimi jeńildetilip, bıznes úshin ákimshilik kedergiler azaıtylǵan. Kásipker máselesin jedel sheshý úshin Úkimet janyndaǵy Investısııalyq shtab turaqty negizde jumys isteıdi. Basym ınvestısııalyq jobalar úshin ruqsat berý rásimderinen ótýdi jedeldetetin «Jasyl dáliz» nemese Fast-track tetigi iske qosylady. Otandyq jáne sheteldik ınvestordyń quqyǵy men múddesin barynsha qorǵaýdy qamtamasyz etý úshin jaǵdaı jasalǵan. Máselen, sheteldik bızneske AHQO-da aǵylshyn quqyǵy men ulttyq quqyqtyq júıe arasynda tańdaý múmkindigi berildi.
Is-shara qatysýshylary jobany iske asyrý tájirıbesimen bólisip, yntymaqtastyq odan ári keńeıetinin aıtty. «China Energy Investment Corporation» bas dırektorynyń orynbasary Iаn Gochýan energetıka salasyndaǵy yntymaqtastyqqa toqtalyp, birlesken joba áleýetine senim bildirdi. «Biz energetıka salasynda kómirdi ázirleý jáne ekologııalyq taza paıdalaný, jańa energetıka, ınfraqurylymdy qoldaý jónindegi qazaqstandyq jobalarǵa belsendi qatysý úshin ozyq tehnologııalardy, kásibı áleýetti jáne tamasha basqarý komandasyn paıdalanatyn bolamyz. Bizge Qytaı men Qazaqstan arasyndaǵy dostyq yntymaqtastyqqa óz úlesimizdi qosý mańyzdy», dedi ol.
«AstraZeneca»-nyń halyqaralyq bıofarmasevtıka óńiri boıynsha vıse-prezıdenti Nıtın Kapýr óz sózinde elimizdiń Ortalyq Azııa farmasevtıkalyq naryǵyndaǵy basty oıynshy retindegi mańyzyna toqtaldy. Kompanııanyń jergilikti óndiristi jáne ınnovasııalyq sheshimderdi damytý jónindegi kúsh-jigeri atap ótildi.
«Qazaqstan Ortalyq Azııadaǵy «AstraZeneca» bıznesiniń lokomotıvi sanalady. Sondaı-aq jahandyq bıofarmasevtıkalyq kompanııa retinde biz Qazaqstan Úkimetiniń óńirdegi farmasevtıka ónerkásibiniń ortalyǵyna aınalýǵa qatysty órshil maqsatyn qoldaımyz», dedi Nıtın Kapýr.
Premer-mınıstr elimizdiń mańyzy basym baǵyty ónerkásipti damytý ekenin aıtyp, sheteldik kompanııalardy qazaqstandyq bıznes-qoǵamdastyqpen tyǵyz áriptestikke shaqyrdy.
«El Úkimeti turaqty jáne boljamdy ınvestısııalyq ahýaldy qoldaý úshin bar kúshin salady. Jobany iske asyrýdyń árbir kezeńinde ınvestorlarmen tikeleı ózara is-qımyl jasaýǵa úlken mán beremiz. Sizderdiń quqyqtaryńyzdy qorǵaýǵa basymdyq jasalǵan. Otandyq kompanııalar iri ınvestorlarmen jetkizý tizbeginde jumys isteı otyryp, tájirıbe jınap, sapa standarttaryn arttyratyn bolady. Mýltıplıkatıvti iri ınvestısııalyq jobalar ártaraptandyrylǵan ekonomıkalyq ekojúıeniń qalyptasýyna yqpal ete otyryp, ShOB beldeýiniń damýyna áser etedi. Biz eldegi sheteldik óndiristiń damýymen ónimderdegi qazaqstandyq qamtýdyń úlesin arttyrýǵa talpynamyz. Otandyq kadrlardy qoldaý máselesine erekshe kóńil bólinedi. Biz sheteldik ınvestorlardyń barlyq deńgeıde jergilikti mamandardy belsendi túrde eńbekpen qamtýyn quptaımyz ári qoldaımyz. El Úkimeti turaqty jáne boljamdy ınvestısııalyq ahýaldy qoldaý úshin bar kúshin salady», dedi Oljas Bektenov.
Is-shara qorytyndysy boıynsha jalpy somasy 7 mlrd dollar bolatyn 32 qujat paketine qol qoıyldy, onyń ishinde Premer-mınıstrdiń qatysýymen:
Aqmola oblysy ákimdigi, «Kazakh Invest» jáne «Dalian Hesheng Holding Group» arasyndaǵy bıdaıdy tereń óńdeý boıynsha quny 650 mln dollar bolatyn strategııalyq yntymaqtastyq týraly kelisim;
О́nerkásip jáne qurylys mınıstrligi, «Kazakh Invest» jáne «CHN Energy» arasyndaǵy kómir hımııa ónimderin óndirý boıynsha 4 mlrd dollar bolatyn strategııalyq yntymaqtastyq týraly kelisim;
«Orhun Medical» JShS men Qazaqstan Úkimeti arasyndaǵy densaýlyq saqtaý salasynyń medısınalyq qyzmetteri men ınfraqurylymyn jaqsartý boıynsha 80 mln dollarǵa ınvestısııalyq kelisim;
«Silk Way Energy LTD» men el Úkimeti arasyndaǵy Jetisý oblysynyń Panfılov aýdanynda táýligine 1 000 000 nm3 qýat tutynatyn tabıǵı gazdy suıyltý zaýyt salý týraly jalpy quny 305 mln dollardy quraıtyn ınvestısııalyq kelisim;
«NK «QTJ» AQ men «Transporteıshn Gloýbel El-El-Sı» arasyndaǵy temirjol mashına jasaý salasynda sıfrlandyrý men jasandy ıntellekt elementterin engizý boıynsha jobany iske asyrý týraly kelisim;
«Carlsberg Kazakhstan» JShS men elimizdiń Aýyl sharýashylyǵy mınıstrligi arasyndaǵy elimizde alkogolsiz sýsyndar shyǵaratyn zaýyt salý boıynsha jalpy quny 100 mln dollar bazalyq qaǵıdattar týraly negizdemelik kelisim;
«Shın-Laın» JShS men Qazaqstan Syrtqy ister mınıstrligi arasyndaǵy álemniń jetekshi kompanııalarynyń qatysýymen Almaty oblysynda azyq-túlik klasterin qurý týraly bazalyq qaǵıdattar týraly negizdemelik kelisim (35 óndiris orny pysyqtaýda);
Qostanaı oblysynyń ákimdigi men «Tech Digital» JShS arasyndaǵy alıýmınıı qorytpalarynan jasalǵan joǵary sapaly shybyqtar men profılder óndirý salasyndaǵy bazalyq qaǵıdattar týraly kelisim;
Batys Qazaqstan oblysynyń ákimdigi men «Hyundai Solar Kz 777» JShS arasyndaǵy quny 167 mln dollar bolatyn kún elektr stansasyn, qaldyqtardy óńdeý keshenin, qoqys jaǵý keshenin, modýldik jylyjaı keshenin salý jónindegi yntymaqtastyq týraly memorandým;
«QazaqGaz» UK» AQ men CNPC arasyndaǵy «Soltústik 1» blogindegi geologııalyq barlaý jumystarynyń áleýetin zertteýdiń birlesken jospary;
«Otbasy banki» AQ men Azııa damý banki arasyndaǵy elimizde ınklıýzıvti jáne jasyl turǵyn úıdi qarjylandyrýdy ilgeriletý jobasy boıynsha ózara túsinistik týraly memorandýmǵa qol qoıyldy.
