Atalǵan sabaqtar muǵalimderdiń bilim kókjıegin keńeıtip qana qoımaı, sonymen qatar ustazdardyń biliktiligi arqyly jastardyń patrıottyq sezimin oıatyp, áskerı qyzmetke degen qyzyǵýshylyǵyn týdyrady. Uıymdastyrýshylar is-sharanyń basty maqsaty saptyq jáne deneshynyqtyrý daıarlyǵyn pysyqtaý ekenin aıtty. Ári osy oqýlarda qatysýshylar teorııalyq pen praktıkalyq daǵdyny bir-birimen ushtastyrdy. Sondaı-aq ustazdar jalpyáskerı jarǵylardyń erejelerindegi negizgi ózgeristermen de tanysty. Buǵan qosa elimizdiń Qarýly kúshteriniń qarý-jaraǵy men áskerı tehnıkasyn tamashalady.
Al dáriste oqytýshylar quramy ártúrli boldy. Ustazdarǵa keńes odaǵynda qyzmet etkender de, birneshe jyl buryn áskerı qyzmetin aıaqtaǵandar da sabaq berdi. Bir qyzyǵy, alǵashqy áskerı daıyndyq páni muǵalimderiniń arasynda qyzdar da boldy. Olarǵa bul pán óte unaıtyn bolǵandyqtan osy mamandyqty tańdapty. Sol úshin arnaıy pedagogıkalyq joǵary oqý ornynda bilim alǵan.
Dáriske qatysýshylarǵa oqý-materıaldyq bazadan oryn berilse, aldyn ala daıyndalǵan jeke quram da solarǵa bólindi. О́z kezeginde 35748 áskerı bóliminiń tájirıbeli nusqaýshylary oqytýshylardy áskerı daıyndyq negizderine qalaı durys ári saýatty oqytý kerektigin baıandap, muǵalimderdiń qyzyqtyrǵan suraqtaryna jaýap berdi.
– Búginde alǵashqy áskerı daıyndyqtyń árbir muǵalimi mekteptiń áskerı-patrıottyq klýbynyń basshysy desek bolady. Osy oraıda qorǵanys isteri jónindegi departamenttiń málimetine súıensek, Shymkent qalasynyń aýmaǵynda 137 mektepte alǵashqy áskerı jáne tehnologııalyq daıyndyq boıynsha sabaq ótkiziledi. Árbir oqýshy armııa týraly maǵlumatty birinshi muǵaliminen alatyny belgili. Sondyqtan biz olardyń qyzmetine erekshe nazar aýdarýymyz kerek. Áskerı bólimde ótken ádistemelik sabaqtar – ustazdardyń bilimi men tájirıbesin baıytýdaǵy alǵashqy qadamdar, – dedi bólim komandıriniń tárbıe jónindegi orynbasary podpolkovnık Qýanysh Aıdynǵalıev.
Qorǵanys salasy mamandarynyń aıtýynsha, búgingi tańda oqýshylardy jaýyngerlik daıyndyq negizderine úıretýdiń mańyzy erekshe. Sebebi sol arqyly bolashaq áskerge shaqyrylýshylardyń boıynda Otan aldyndaǵy boryshyn óteýge degen sezimi oıanady ári jasóspirimderdiń soǵan ishteı daıyndalyp júrýine múmkindik týady. Jalpy, áskerıler mundaı sabaqtar qala men eldi mekendegi bilim berý uıymdarynda áskerı daıyndyq pánin oqytýda oń ózgeristerge jol ashady dep úmittenedi. Bul dáriste muǵalimder ózara tájirıbe almasýǵa, sabaq barysynda týyndaǵan qıyndyqtardy ortaǵa salyp birge talqylaýǵa, sondaı-aq bilim berý úderisin jaqsartý boıynsha usynystaryn ázirleýge múmkindik aldy.
– Mundaı is-sharalar pedagogterdiń biliktiligin arttyryp qana qoımaı, óskeleń urpaqtyń sanasyn silkindirip, patrıottyq rýhyn kúsheıtýmen de mańyzdy. Bólim basshylyǵy jastardy patrıottyq rýhta tárbıeleý isinde ustazdarmen birlesip jumys isteýge árqashan da daıyn. Osy oraıda áskerı men bilim berý mekemeleri arasyndaǵy yntymaqtastyq odan ári arta beredi degen úmittemin, – dedi podpolkovnık Q.Aıdynǵalıev.
