Mınıstrler mádenı qarym-qatynastardaǵy eleýli ilgerileýdi atap ótip, eki el prezıdentteriniń ózara saparlarynyń birlesken bastamalarǵa jańa serpin beretinin aıtty.
Kezdesý barysynda taraptar mýzeıler jáne mádenı mura salasyndaǵy yntymaqtastyq nıeti týraly deklarasııasyn, sondaı-aq Qazaqstan Respýblıkasynyń Ulttyq mýzeıi men Gıme mýzeıi arasyndaǵy ózara túsinistik týraly memorandýmdy qosa alǵanda, birqatar kelisimge qol qoıdy.
«Qazaqtyń tarıhı jáne mádenı murasyn jahandyq gýmanıtarlyq keńistikke nasıhattaý jáne ıntegrasııalaý – memlekettiń mádenı saıasatyndaǵy basymdyqtardyń biri», dedi A.Balaeva.
Sondaı-aq ǵylymı zertteý salasyndaǵy yntymaqtastyqty kúsheıtý, «Courants du Monde» baǵdarlamasy aıasynda qazaqstandyq mamandarǵa arnalǵan taǵylymdamalar uıymdastyrý usynyldy.
«Prezıdent Toqaevtyń Fransııaǵa bul memlekettik sapary mádenıetke qatysty kóptegen máseleni qamtıtynyna qýanyshtymyn. Biz birneshe memorandýmǵa qol qoıdyq. Bul aradaǵy tyǵyz yntymaqtastyqty kórsetedi. Sonymen qatar Gıme mýzeıinde Qazaqstannyń ulttyq kórmesiniń uıymdastyrylýy – qarym-qatynastarymyzdyń naqtylyǵy men tıimdiliginiń dáleli», dedi R.Datı.
О́z kezeginde A.Balaeva jasalǵan kelisimder mádenı baılanystardyń odan ári tereńdeı túsýine yqpal etip, Qazaqstan men Fransııa arasyndaǵy qarym-qatynastardy nyǵaıtatyn jańa birlesken jobalarǵa negiz bolatynyna senim bildirdi.
«Biz kınoóndiris salasy, qazirgi zamanǵy qazaq ádebıetin Fransııada jáne fransýz ádebıetin bizde tanystyrý, konserttik uıymdardyń ózara is-qımyly jáne balalar kontentine qatysty birlesken mádenı is-sharalar ótkizý múmkindikterin qarastyrýymyzǵa bolady», dedi mınıstr.
Buǵan qosa kezdesýde mýzeı saraptamasy boıynsha tájirıbe almasý, tarıhı murany saqtaý jáne mýzeı isine jańa tehnologııalardy engizý máseleleri talqylandy. Eki eldiń mınıstrleri kreatıvti ındýstrııa, onyń ishinde sán salasyndaǵy yntymaqtastyqqa qyzyǵýshylyq tanytty. A.Balaeva ulttyq sán ónerine jáne onyń álemdik deńgeıdegi kórsetilimine nazar aýdarýdy usyndy.
