Jańa mekteptiń ashylý saltanatyna oblys ákimi Narıman Tóreǵalıev, Bórli aýdanynyń ákimi Erkebulan Ihsanov, KPO bas dırektorynyń orynbasary Muhtar Mankeev, merdigerler men turǵyndar qatysty.
KPO bas dırektorynyń orynbasary Muhtar Mankeev Jarsýat aýylynyń turǵyndaryn jańa nysannyń paıdalanýǵa berilýimen quttyqtap, barlyq qajetti qural-jabdyqpen qamtylǵan jańa mektepte oqýshylardyń bilim alýyna qolaıly jaǵdaı jasalǵanyn jetkizdi. Memleket basshysy Qasym-Jomart Toqaev Joldaýda balalardyń aýylda da, qalada da sapaly bilim men tárbıe alýǵa teń jaǵdaı jasaý qajettigin birneshe ret atap ótken edi. Búgingi is-shara sonyń bir dáleli desek bolady.
Jańa mektep barlyq talapqa saı salynyp, balalardyń sapaly bilim alýyna barynsha qolaıly jaǵdaı jasalǵan. Joba boıynsha mektepte 108 oqýshy bilim alýǵa tıis. Nysan oqý, sondaı-aq sport jáne májilis zaly bar korpýstan turady. Mektepte qajetti oqý qural-jabdyqtary men kabınetter, sonyń ishinde májilis zaly, bólek salynǵan jýyný jáne ájethanasy bar sport zaly, qazirgi zamanǵa saı ashana men ákimshilik bólmeleri ornalasqan. Joba aıasynda shaǵyn jınaqty mektep aýmaǵyn abattandyrý jumystary júrgizilip, ShAF ornatyldy. Sonymen qatar oqýshylarǵa arnap sport alańy men júgirý joly jasalǵan.
Aıta keteıik, О́BTK boıynsha áleýmettik mindettemeler sheńberinde «Karachaganak Petrolıým Opereıtıng B.V.» kompanııasy jyl saıyn jergilikti bılik organdarymen birlesip, kóptegen áleýmettik jáne ınfraqurylymdyq jobalardy júzege asyryp keledi.
