Sýretti túsirgen – Aleksandr MARChENKO
Jarystyń saltanatty ashylý rásimine jergilikti bılik, zııaly qaýym ókilderi arnaıy kelip, qaıratkerdiń esimin zor qurmetpen eske aldy. Balapan Zıpatollauly sanaly ǵumyryn quqyq qorǵaý salasyna arnady. Qarapaıym tergeýshiden Temirtaý qalasy prokýrorynyń orynbasary qyzmetine deıin kóterildi. Ár jyldary oblystyq prokýratýrada, ádilet departamenti bastyǵynyń orynbasary, keıinirek oblysta sottar ákimshisi bolyp qyzmet istedi. Oblys ákiminiń keńesshisi laýazymyna taǵaıyndaldy.
– Týrnırdiń laıyqty deńgeıde ótýine lepti úles qosqan oblystyq dene shynyqtyrý jáne sport basqarmasy men jastar fýtbol mektebiniń basshylyǵyna, qaıratker azamat, rýhanııat janashyry Erǵazy Qadashulyna alǵys aıtamyz. Jylda B.Ábenovtiń kózkórgen zamandastary da demeýshilik kórsetip jatady. Júlde qory qomaqty. О́ńirde shaǵyn fýtboldy damytý qashanda mańyzdy. Bıyl irikteýden ótken úzdik komandalar keldi. Mektep jasyndaǵy jasóspirimderge bul – tyń múmkindik, – dedi elimizdiń eńbek sińirgen jattyqtyrýshysy Ramazan Sáttibaı.
Eki kúnge sozylǵan jarysta Qaraǵandynyń «Qyran» komandasy týrnır jeńimpazy atandy. Ekinshi oryndy Abaı aýdanynan kelgen fýtbolshylar ıelendi. Úshinshi oryn qaraǵandylyq «Skaýt» komandasyna buıyrdy.
– Jarystyń deńgeıi jyl ótken saıyn joǵarylap, qatysýshylar qatary kóbeıip keledi. Bul joly Aqmola, Qaraǵandy, Ulytaý oblystarynyń fýtbolshylary qatysty. Jeńimpazdar men júldegerler dene shynyqtyrý jáne sport basqarmasynyń kýboktary, medaldary, gramotalarymen marapattaldy. Buǵan qosa Balapan Ábenovtiń týǵan-týystarynyń, dos-jarandarynyń demeýshiligimen aqshalaı sertıfıkattar tabystaldy. Kelesi jyly bul týrnırdi respýblıkalyq deńgeıde ótkizemiz dep otyrmyz, – dedi jarystyń bas tóreshisi Balǵabaı Nurlanov.
Týrnır B.Ábenovti eske alý ǵana emes, eń aldymen, jas sportshylardy qoldaýdyń ózgeshe úlgisi. Dástúrli dop dodasy balalardyń fýtbolǵa degen qyzyǵýshylyǵyn arttyryp, jas jetkinshekterge ynta-jiger syılaıdy.
Qaraǵandy oblysy
