Foto: Erlan Omar
Aımaǵambetovtyń pikirinshe, memlekettik bıýdjettiń tapshylyǵy taǵy birneshe máselemen tyǵyz baılanysty: memlekettik qaryz, ártúrli qorlardyń «ekinshi bıýdjet» retinde paıda bolýy, tıimsiz bıýdjetaralyq qarym-qatynastar jáne bıýdjettik tártiptiń álsizdigi.
«Memlekettik qaryz jáne ony qoǵam tarapynan baqylaý máselesi áli de sheshilmegen kúıde qalyp otyr. Bizge syrtqy jáne ishki qaryzdardyń qatań ashyqtyǵyn jáne baqylaýyn qamtamasyz etetin júıe qajet. Qaryzdyń ári qaraı ósýi bizdi bıýdjet daǵdarysyna ákelýi múmkin. Kodeks jobasynda bizdiń túzetýlerge qaramastan, bul másele júıeli túrde sheshilmeı tur», dep jazdy Ashat Aımaǵambetov Telegram parashasynda.
Sonymen qatar depýtat kvazımemlekettik qurylymdar kóbinese parlamenttik jáne qoǵamdyq baqylaýsyz iri kólemde qaryz alatynyn tilge tıek etti.
«Bul jaǵdaı memlekettik organdarǵa osyndaı qaryzdardy Parlamentpen kelisýsiz júzege asyrýǵa múmkindik beretin tetikke aınaldy. Jańa Bıýdjet kodeksi bul tetikterdi tolyq jappaıdy jáne mundaı baqylaýsyz qaryzdardy shektemeıdi. Úkimet qaryzdyń qaýipsiz deńgeıi týraly málimdemelermen tynyshtandyrýǵa tyrysady, biraq bul jaǵdaı odan da úlken alańdaýshylyq týdyrady», dedi ol.
Onyń aıtýynsha, «Ekinshi bıýdjet» retinde jumys isteıtin ártúrli qorlar Parlamenttiń jáne tipti Joǵarǵy aýdıt palatasynyń jalpy qarjylyq baqylaýynan tys qyzmet etedi.
«Qarjylyq josparlaýdyń birtutastyǵyn qalpyna keltirý úshin olar jalpy strategııanyń bir bóligi bolyp, Parlamentke esep berýge mindetti bolýy kerek. Bıýdjet biryńǵaı bolýy tıis, al bul máselege qatysty bizdiń túzetýlerimiz áli de talqylaý kezeńinde tur», dedi Aımaǵambetov.
Depýtat Samuryq-Qazynadan dıvıdendterdi bıýdjetke aýdarý máselesine de nazar aýdardy. Samuryq-Qazynadan bıýdjetke dıvıdendter aýdarý máselesi áli sheshimin tappaǵan. Dıvıdendter bıýdjetke túsip, qajet bolǵan jaǵdaıda Samuryq-Qazyna kompanııalarynyń ınfraqurylymdyq jobalaryn qaıta ınvestısııalaýǵa baǵyttalýy tıis.
«Eń bastysy, barlyq qarajat bıýdjet arqyly ótýi kerek. Qazirgi tańda, júzdegen mıllıard, tipti trıllıonǵa jýyq qarajat bıýdjetten tys qalyp otyr deýge bolady. Bul qarajattyń bir bóligi úkimettiń tapsyrmasy boıynsha áleýmettik-mádenı nysandardy salýǵa jáne basqa da áleýmettik baǵyttarǵa jumsalady, alaıda bul qarajattyń jumsalýy ashyq emes, bıýdjettiń jalpy maqsattarymen baılanysty emes jáne qoǵamdyq ári bıýdjettik baqylaýdan tys ótedi. Bul jerde de naqty sharalar qajet», dep qorytyndylady Ashat Aımaǵambetov.
