– «Isker talks» jobasynyń maqsaty qandaı?
– Aqparattyq tehnologııalar saǵat saıyn damyǵan zamanda burynǵy qundylyqtar júıesin saqtap qalý sonshalyqty qıyndaı tústi. Ásirese jas býyn tárbıesinde jiberip alyp jatqan kemshilikterimiz bary belgili. Prezıdent Qasym-Jomart Toqaev qoǵamǵa jańa syn-qaterlerdiń qaýpi tóngen kezde zııaly qaýymǵa úlken úmit pen jaýapkershilik artylatynyn beker atap ótken joq. Memleket basshysynyń «Ult taǵdyry synǵa túsken sátte kózi ashyq azamattar árdaıym kósh bastaǵan. Adasqanǵa jón siltep, jastarǵa baǵyt-baǵdar bergen. El aǵalary biraýyz sózben tentegin tyıyp, tektisin tórge ozdyrǵan. Biz qanymyzǵa sińgen osy qasıetten aırylmaýymyz kerek» degen sózi el tiregi bolashaq urpaq desek, adamgershilik, ádildik, parasat syndy qasıetterdi sińirýge, sapaly bilim men sanaly tárbıe berýge umtylýymyz qajet ekenin kórsetedi.
Demek jas otandastarymyzǵa úlgi tutatyn, ómirlik jolynda bıik qoıatyn tulǵalar qajet. Ol – kóptiń kókeıindegi dúnıeni ashyq jetkizetin, bastysy jetistikter men tabysqa tabandy eńbekpen jetken jandar bolýy kerek.
Al iskerlik ári kóshbasshylyq qabileti arqyly aýqymdy qaýymdastyqtar qurǵan qoǵam belsendileri men kásipkerlik rýhymen qoǵamnyń damýyna, jańa jumys oryndarynyń ashylýyna, el ekonomıkasynyń órkendeýine úles qosyp júrgen kásipkerlerimizdiń eńbegin jastarǵa nasıhattaý – «ÓzgeEpic» keńistigi maqsattarynyń biri. «Isker talks» jobasynyń maqsat-mindeti osy atalǵan qundylyqtarmen úndesedi.
– Alańda osy ýaqytqa deıin kimder qonaq boldy?
– Kez kelgen otandyq ozyq maman óziniń júrip ótken joly, kezeńderi, salasynyń artyqshylyqtary men kemshilikteri, óziniń sheshimderi men kózqarastarymen bólisedi. Qonaq jınalǵan aýdıtorııamen suhbat qura otyryp, olardyń suraqtaryna, óz isin bastaǵysy kelip júrgenderge ózine kómektesken bilimi men tájirıbesin eskerip, bólisedi. Spıker men kelgen aýdıtorııa músheleri ózara tanysyp, alda iske asýy múmkin jobalardy josparlaýǵa múmkindik alady.
Bizdiń alańnyń alǵashqy spıkeri qaıyrymdylyq qozǵalysyn jańa sapalyq deńgeıge kótergen otandyq qor «Asarume» negizin qalaýshy Ashat Nurmashev boldy. Kezdesýde ol jastarmen óziniń jetistik jolyndaǵy bes qupııasymen bólisti. Bul – ádildik, shynshyldyq, jomarttyq, erlik, yqylas. Odan keıin bilim salasyndaǵy bıznestiń múmkindikteri men qıynshylyqtary týrasynda alańda «Daryn» memlekettik jastar syılyǵynyń laýreaty, «Bugin» holdınginiń dırektory Aıbek Qýatbaı sóz sóıledi.
Qazir ózekti ári trendtegi sala IT baǵytynda kásipker Aıbolat Qulataı spıker retinde shaqyryldy. Qonaq qazaqsha kontent jasaýdaǵy úrdistermen, qalaı monetızasııa jasaý kerek ekenin kórsetti. Al tarıh pen búgindi ádemi ushtastyra bilgen kreatıv ónimder týrasynda «Olja_peak» kásibiniń negizin qalaýshy, bes tilde erkin sóıleıtin, otandyq ónimdi damytýǵa úles qosyp júrgen japontanýshy Sáýlet Baqytkeldi kelip, tájirıbesimen bólisti.
Mine, osy aptada ǵana Qazaqstannyń tanymal kásipkeri jáne qoǵam qaıratkeri, «Respublica» partııasynyń teń tóraǵasy, «AgromashHoldıng KZ» AQ prezıdenti, Qostanaı traktor zaýytynyń dırektory Dınara Shúkijanova «Saıasat pen bıznestegi áıelderdiń róli» taqyrybynda dáris oqydy. Suhbat barysynda Dınara kásibı jolynyń alǵashqy qadamdarynan bastap, bızneste tabysty bolýdyń qyr-syryn, strategııalyq oılaý men sheshim qabyldaýdyń mańyzdylyǵyn jan-jaqty taldady. Ol saıasat pen bıznestegi áıelderdiń róline erekshe toqtalyp, názik jandylardyń qoǵamdyq jáne ekonomıkalyq salalarǵa qosatyn úlesin arttyrýdyń mańyzyn atap ótti. Onyń aıtýynsha, qazirgi zamanǵy ozyq mamandar basqarýshylyq qabileti men kásibı áleýeti arqyly qoǵamda oń ózgerister jasaýǵa qabiletti. D.Shúkijanova osy baǵyttaǵy jańa bastamalardy damytý – eldiń turaqty damýyna jáne ekonomıkalyq órleýine oń áser etetinin basa aıtty. Osyndaı jetekshi tulǵalardyń tájirıbesi men qundy keńes el jastarynyń ómir jolynda baǵyt-baǵdar bolary anyq.
– Jastar qandaı qamqorlyqqa zárý?
– Álemniń ár túkpirindegi memlekette, ár zamanda jastar erekshe iltıpat pen qamqorlyqqa ıe. Kópshilik ult úmitin arqalaǵan el erteńi jastar dep senedi. Sondyqtan olardyń qazirgi qajettilikterin ótep, ótkir turǵan máselelerin sheshý, damýyna jaǵdaı jasaý ár azamattyń mindeti sanalady. О́ıtkeni elimizdiń tarıhy men mádenıetiniń taǵdyry, damýy men modernızasııalanýy búgingi urpaqpen tikeleı baılanysty.
El jastaryn alańdatar túıindi másele kóp. Basym kópshiligi baspana, jumyssyzdyq jaıyn oılaıdy. Keı bóligi bilim sapasy men rýhanı qundylyqtaryna alańdaıdy. Endi biri jastar saıasatyndaǵy olqylyqtardy tizbektep, áli de nazar aýdarý kerek dúnıelerdi atap jatady. Menińshe, ár máselede jas býynǵa baǵyt-baǵdar berý mańyzdy. «ÓzgeEpic» kreatıv haby jastardy jańashyldyqqa úndeıdi. Zamanaýı básekege qabiletti otandyq ónerdi damytady, qoǵamnyń mádenı sanasyn arttyrýǵa sep bola otyryp, daryndy, zııatker jastardy qoldaıdy.
– Áńgimeńizge rahmet.
Áńgimelesken –
Zeıin ERǴALI,
«Egemen Qazaqstan»
